Misileraanikkut akiitsorpassuit ikilisarniarneqassapput

Ineqarnermut naalakkersuisup Siverth K. Heilmannip akiliinngitsoortartut amerliartuinnerat pissutigalugu aaqqissuussineq Kiffaq eqquteqqinneqassanersoq maanna isumaliutigaa. Aaqqissuussinikkut ineqarnermut akiliutit akissarsianit ilanngaatigineqartassapput.
apriilip 28-at 2014 04:59

Radioaviisimi qanittukkut oqaluttuaraarput innuttaasut pisortanut akiitsui aatsaat taama sukkatigisumik qaffakkiartulersimasut. Innuttaasut pisortanut akiitsui ukiup ataatsip ingerlaneriinnaani 50 millionit koruuninik qaffariaateqarput maannalu katillugit 900 millionit koruuninngorsimallutik. Tamatumani pineqarput akiligassatigut kinguaattoorutit suulluunniit, meeqqamulli tapit, ineqarnermut akiliutit aamma akileraarutinut akiliutit ikinaarutaat amerlanerpaapput.

Kommune Kujalleq kommuniuvoq innuttaasut ineqarnermut akiliutinik akiliinngitsoortarnerinik eqqugaanerpaasoq. Kommunimi tamanna pissutigalugu aaqqissuussineq Kiffaq misiliutit eqqunniarlugu aalajangersimavoq, aviisi Sermitsiaq taama allaaserisaqarpoq.

- Innuttaasorpassuit suliffeqarfippassuillu akileerusussuseqannginnerat takusinnaavarput. Aaqqissuussineq Kiffaq aaqqissuussineruvoq pisariitsoq pitsaasorlu, kikkut pisortanut akiligassaminnik akiliinissaannik siunissami qulakkeerisinnaasoq, kommunimi borgmesteri, Jørgen Wæver Johansen, aviisimut taama oqarpoq.

Ineqarnermut naalakkersuisup, Siverth K. Heilmannip Atassummeersup, aaqqissuussineq Kiffaq nuna tamakkerlugu eqquteqqinneqassanersoq maanna isumaliutigileruttorpaa.

- Tunngaviusumik inoqutigiit akiligassatik nammineerlutik akilertartussaagaluarpaat, aaqqissuussinerli Kiffaq aqqutigalugu akiligassatigut kinguaattooruteqartarnermik ajornartorsiut qaangerniarneqarsinnaassaaq, Siverth K. Heilmann aviisimut taama oqarpoq.