Maliina Abelsen: Kiffaq konto pisariaqarpoq
- Nassuerutigisariaqarparput oqartussanut aningaasarpassuarnik akiitsoqaratta aammalu ullumikkut akiitsunik akiliisitseriaaseq ajorluinnarmat, Maliina Abelsen oqarpoq.
Nunatsinni innuttaasut oqartussanut akiligassaat siorna 1 milliard koruunit missaanniipput. Allatut oqaatigalugu, Nunatsinni innuttaasugut tamarluinnatta ataasiakkaarluta 22.000 koruuninik akiitsoqarpugut.
Ullumikkut akiitsunik akiliisitsiniariaaseq atuinnassagutsigu ajornartorsiut qaangerneqarsinnaanngilaq, akiliisitsiniarnermilu suliassat 260.000-tiusut ikiliartornaviaratik. Taama amerlatigisunik suliassaqarneq 800 million koruuninik naleqarpoq, Aningaasaqarnermut Naalakkersuisunngorlaaq, Maliina Abelsen oqarpoq.
- Assersuutigiinnarlugu taasinnaavarput, eqqakkanik igitsinermut akiligassaq 400 koruunilik akilinngikkutsigu, taava allaffissornermik suliallit 20-it aqqusaarneqartarput. Tamannaannarluunniit eqqarsaatigalugu tamanna tamatsinnut naapertuilluartuunerunngilaq. Taamaattumik aaqqiissutissaq kikkunnut tamanut naapertuuttoq ujartariaqarparput, Maliina Abelsen oqarpoq.
Akileraartarnermut Atugarissaarnmermullu Ataatsimiititaliap siunnersuutigaa, akiitsullit immikkut sullinneqartariaqartut, kiffartuussinertut isikkulimmik. Siunnersuullu qulequtsiunneqartoq qanganisarpalulaaraluartoq siunnersuutigaat, akiitsunik akiliiniarnermi Kiffaq-konto atorneqarsinnaasoq. Demokraatit siulittaasuat, Jens B. Frederiksen isumaqarpoq, siunnersuut taanna kikkunnilluunniit akilersuisunit konto taanna atorneqarsinnaasoq.
- Tamatta nalunngilarput, akiligassat tungaatigut saaffissallu tungaatigut kiffartuunneqarneq pitsaasoq tamatsinnut iluaqutaasartoq. Akiligassallu ataatsimut suliarineqartalerpata tamanna tamanut pitsaanerpaamik iliornerussaaq. Apeqqutaanngilaq bankimut imaluunniit innersuutaasumut akiliisalernissarput, apeqqutaanerpaavoq tamatta iluamik sullinneqarnissarput.
Jens B. Frederiksen taama oqarpoq. Siunnersuutip qanoq iluseqarluni atorneqalersinnaanera oqallisigineqartariaqartoq, Aningaasaqarnermut Naalakkersuisup, Maliina Abelsenip oqaatogaa. Aamma taassuma oqaatigaa innersuussutigineqartoq taamatut isikkoqarluni atorluarsinnaasoq.
