Pisortanut akiitsut amerliartupiloortut
Innuttaasut pisortanut akiitsui amerliartuinnarput.
Pisortanut akiitsoqarpugut - akiitsullu ukiormanna amerlasuupilussuupput. Maannakkorpiarmi 932 millionit koruuninik akiitsoqarpugut. Meeqqanut tapinut ukiuni 7,5-ini aningaasartuutigineqartartut amerlaqatigaat, Inatsisartut aningaasaqarnermut akileraartarnermullu ataatsimiititaliaat taama ilisimatitsivoq.
Akiitsut 2013-imiilli 80 millionit koruuningajannik amerleriarsimapput, 2011-milu akiitsut amerlassusaat qanilliartorpagut, taamani akiitsut 1,1 milliardit koruuninik amerlatigipput.
Aamma atuaruk Innuttaasut pisortanut akiitsui ikiliartorput
Taamatullu ineriartortoqarnera Akileraartarnermut aqutsisoqarfimmi pisortap Kim Neumannip tupaallannartoqartinngilaa. Nunatsinni aningaasaqarnikkut pitsaanngitsumik inissisimasoqarnera tamatumunnga nassuiaatissatut ilaatigut tikkuarpaa.
- Suliffissaaleqisut amerliartorput, tamatumalu malitsigisaanik innuttaasut aningaasaatikinnerulerput taamaattumillu akiligassat tamaasa akilersornissaat ajornakusoortillugu. Tamatumanilu unammillernartut ilagaat ineqarnermut, imermut kiassarnermullu akiliutitigut kinguaattoorutaasut amerliartornerat.
Pingaartumik akilersuutit, inissialiornermut tapiissuteqartarneq aqqutigalugu taarsigassarsiat ineqarnermullu akiliutit akilersoruminaatsinneqarput.
Maannakkorpiarlu akilersuutinuinnaq 330 millionit akiitsorineqarput - akiitsut tamarmiusut pingasorarterutaat missiliorlugit.
Aamma atuaruk Misileraanikkut akiitsorpassuit ikilisarniarneqassapput
Innuttaasut akiitsuminnik nalinginnaasumik akilersuerusuttartut Kim Neumannip oqaatigaa. Aammali ilaqarput akiliinngitsuuinnartartunik.
- Innuttaasunik oqaloqatiginniartoraangatta malugisinnaasarparput akiliuteqarnissaq imaluunniit naafferaalluni akilersuinissaq aningaasassaqartinneqakkajuttartoq. Tamannalu aningaasaateqartoqarneranut takussutissaavoq, allatulli atornissaat toqqarneqarsimasoq.
Akiitsunik qanoq akiliisitsiniarnissaq Namminersorlutik Oqartussat kommunillu akunnerminni isumaqatigiissutiginissaanut aamma pikkoriffiginerusinnaagaat, Kim Neumannip oqaatigaa.
Akiitsulli ikilisinniarnissaanut pingaarnerpaaq tassaavoq innuttaasut ataasiakkaat iliuuseqarnissaat.
Aamma atuaruk Allat akiitsui akilerusuppigit?
- Aningaasaqarnikkut inissisimaneq pillugu ornigulluni oqaloqatigiartorneqarsinnaavugut. Isumaqatigiissusiornissaq ammaffigisupilussuuarput. Pisortanut akiitsoqarneq amerlanernut nuanniitsuusarput, tamatuminngalu ikiorusuppagut, taama oqarpoq.
Namminersorlutik Oqartussat kommunillu akiitsunik akiliisitsiniarnissaq pillugu ataatsimoorlutik iliuusissat pillugit pilersaarummik akuersissuteqarsimapput, Kim Neumann ilisimatitsivoq.
