IA borgmesteriutitaqarnerulersut

Kommunimut qinersinermi inernerit naammassimmata Kommuni Kujallermi inernerit maluginiagassaapput.

Kommuni Kujallermi partiit annersaat Siumut Inuit Ataqatigiinnit ajugaaffigineqarpoq.

Tassalu Inuit Ataqatigiit Kommuni Kujallermi borgmsteriutitaqartussanngorpasillutik.

Kommunimulli qinersineq tamakkiisoq ima isikkoqarpoq.

Inuit Ataqatigiit Kommuni Kujallermi taaguunneqangaatsiarpoq, tassalu Siumut siuttuujuarsimasoq maanna qaangerlugu taaguunneqarpoq.

AAMMA ATUARUK Inuit Ataqatigiit Inatsisartunut qinersinermi ajugaasut

Kommunimut qinersisoqanngitsiarnerani Siumumi tapersersorteqarluarnertik oqaatigigaluarpaat, qinersinermili IA tapersersorneqarnerusoq erserpoq. Tassami qinersisartut affaat sinnerlugit 50,9 procentinik taaguunneqarpoq.

Taamaalilluni Siumut kinguariarluni 40 procentinik taaguunneqarluni, 15 procentpointinik kinguariarpoq.

Narsami Kuannersuarni aatsitassarsiorsinnaanermut oqallinneq Inuit Ataqatigiit ajugaangaatsiarnerannut peqqutaanerpaavoq, Inuit Ataqatigiimmi aatsitasarsiornissap unitsinneqavinnissaanik oqariartuuteqarput.

Stine Egede Inuit Ataqatigiinneersoq, Kommuni Kujallermi taakuunneqarnerpaavoq, taamaalillunilu borgmesteritut nutaatut inissittussanngorluni.

Ludvigsen borgmesteriiginnarsinnaavoq

Avannarparteriarutta Kommuneqarfik Sermersuumi aamma Inuit Ataqatigiit siuttuupput.

Charlotte Ludvigsen qinersisut 45 procentinit taaguunneqarluni taaguunneqarnerpaavoq borgmesteritullu ingerlaqqittussanngorpoq.

- Qinersisut takutippaat maani Kommuneqarfik Sermersuumi amerlanerussuteqartugut. Taamaattumik periarfissaqarpugut aqagu kaffisoqatigiinnerit siuttutut ingerlassinnaalutigit, taamaattumik neriuppunga borgmesteritut ingerlaqqiinnarnissara taperserneqassasoq.

Kommuneqarfik Sermersuumi Naleqqakkut aamma taaguunneqarluarput. Taakku tunumiit taaguunneqarluarnermikkut qinersisut 10 procentiinit qinerneqarput.

Qeqqata Kommuniani Naleraq siuariartoq

Qeqqata Kommuniani Siumumut qinersisut ikileriaraluarlutik partii suli annersaavoq.

Qinersisut sisamaagaangata ataaseq Naleqqamut taasivoq, tassalu kingullermik qinersinermut sanilliullugu amerleriarujussuarnit taaguunneqarlutik, Atassutillu qinigaatitai ataatsimik ikileriarlutik.

AAMMA ATUARUK IA-p siulittaasua: Tamassinnut qujanaq!

Qeqqata Kommuniani Siumumut qinersisut ikileriaraluartut, borgmesterimut Malik Berthelsenimut qinersisut kingullermik qinersinermut sanilliullugit marloriaatingajammik amerleriarput qinerneqarnerpaallunilu.

Taanna suleqqinnissaminut, Naleqqamullu suleqateqarnissaminut piareersimavoq.

- Qinersisunut tamanut, partiitsinnullu qinersisimasunut tamanut qujanarujussuaq. Qujanasuutiginerpaavara uani qinigaaffimmi suliniutitta nangeqqinnissaanut innuttaasuninngaanniit pisussaaffilerneqaratta.

Malik Berthelsen taama oqarpoq imalu nangilluni:

- Isertuutissanngilara, ullaaq manna pissangasorujussuunikuuvunga. Ukiuni kingullerni sisamani borgmesteritut sulinera tassa ullumikkut nalilerneqartussaammat, ilaa tassa misilitsinnerugami. Taammaammat takusinnaavara sulinera innuttaasuninngaannit naammagisimaarneqarsimasoq, taanna assorujussuaq nuannaarutigivara.

Qeqartalimmi IA ajugaasoq Avannaani Siumut ajugaavoq

Kommunenut qinersinermi inernerit kingullersaat Kommune Qeqertalimmit pissarsiarineqarput. Kommunemi illoqarfiit anginersaanni taasinerit kisilluaqqissaarneqarput. Qinersisut 53 procentii Inuit Ataqatigiinnik qinersinerisigut Ane Hansenip borgmesteriunini tiguminnaarsinnaarpasippaa.

Avannaata Kommuniani Siumut suli siuttuuvoq. Taaguunneqarnermigut kinguariaateqaraluarluni 46 procentinit taaguunneqarluni, Avannaata Kommuniani partiitut annerpaatut ingerlaqqippoq.

Avannaata Kommuniani Minik Høegh-Damip borgmesterimit Palle Jerimiassenimit taaguunneqarnerunera maluginiagassaavoq.