IA: Aningaasaliissutit kommuuninut nuunneqarlik
Sanaartornermut aningaasaliissutit Nuup avataani inissaaleqiffiusunut toqqaannaannartumik tunniunneqartalernissaat Bendt B. Kristiansenip, Inuit Ataqatigiit sinnerlugit Qaasuitsup Kommuniani ilaasortap kissaatigaa:
- Tassa isumaqarpunga inissialiornerni suliat oqimaalutarneqartarneri pisariaqartitsiffiunerusunut naapertuunnerusumik ilusilersorneqartariaqartut. Taamaalilluni aamma illoqarfiit Nuup avataaniittut pisariaqartitsilluinnartullu inissialiornikkut pitsaanerusumik periarfissaqartinneqalissammata, Bendt B. Kristiansen oqarpoq, nangillunilu:
- Sineriapput ataatsimut isigalugu inissaaleqisorpassuaqarfiuvugut. Taamaattumillu aamma sanaartornerup, inissialiornermut sammisortaani, akisussaaffiup kommuuninut nuunneqartariaqarneranut eqqartuinissarput tikittariaqaleripput isumaqartunga.
Kommuneqarfik Sermersuup borgmesteriata, Asii Chemnitz Naarup-ip sanaartornermik aningaasalissutit kommuuninut toqqaannartumik nuunneqarsinnaaneri isumaqatigai. Kisiannili:
- Taamaattorli uanga kissaatigissavara qulaajaasoqaqqaartariaqartoq. Assersuutigalugu sumiiffimmiit sumiiffimmut sanaartugassanut akit assigiinngitsorujussuupput aammalu illuutit tuniniarneqarnerani assigiinngitsorujussuarmik akeqartitsisoqartarluni.
Inuit Ataqatigiit siulittaasuata, Kuupik V. Kleistip, sanaartornermi aningaasaliissutini inissialiortitsinermut tunngasut siulliullutik kommuninut nuunneqarsinnaaneri ammaffigaa:
- Isumaqarpunga uanga inissialiortitsinermut tunngasut siulliullutik eqqarsaatigineqartariaqartut kommuuninut nuunneqarsinnaaneri, Kuupik V. Kleist oqarpoq.
Inuit Ataqatigiinni ataatsimeersuartut politikkikkut siunnerfissat eqimattakkaarlutik ullup sinnera. Oqaluuserisaat aqagu ullaakkut saqqummiunneqassapput.
