IA: akitsuutit mikisut kisianni amerlasuut aqqutissaapput

- Nunat allat aningaasaatillillu assigiinngitsut kisiat isumalluutigalugit nunarput ineriartortinneqarsinnaanngilaq, Aqqaluaq B. Egede taama oqarpoq.

Aleqa Hammond aningaasanut inatsisissaq pillugu isumaqatigiinniarnissat sioqqullugit nalunaareerpoq,

innaallagissap uuliallu akitsorneratigut annaasat akileraarutinik qaffaanikkut nutaanillu akitsuusersuinikkut pissarsiarineqassappata, peqataassanatik. Akitsuinerit, Namminersorlutik Oqartussat missingersuutaareersut qaavisigut 187 millioni koruuninik aningaasartuuteqassasoq, aningaasaqarnermut naalakkersuisoq qanittukkut nalunaarpoq.

Aqqaluaq B. Egedelu kaammattuivoq, inuiaqatigiit nammineq piginnaasaqassusiat tatigineqarneroqqullugu:

- Nunatsinni politikikkut ingerlatsisuni ima eqqarsartarneq qimanniarneqartariaqarpoq; "inuiaqatigiit susinnaanngilagut" "saperparput".

Akitsuutit assiiinngitsut amerlasuut siammasinnerusumillu eqquisut aqqutissaasut, Aqqaluaq B. Egede isumaqarpoq:

- Aningaasat Nunatta pisariaqartitai siammasinnerusumik appasinnerusumillu akilerlugit akitsuutitigut aasinnaavagut, akitsuutit inummut aalajangersimasumut tuttut malunnaateqannginnerusumik akilersorneqarsinnaasunngortillugit.

Aqqaluaq B. Egedep Aleqa Hammond isumaqatigaa oqarmat, pisuut pissakinnerillu atugarisaat imminnut ungasippallaartut, oqarlunili tamanna qangali ajornartorsiutaasoq. Tamannalu aaqqiivigissagaanni inuit pisortanit ikiorsiissutinik pingaarnermik isertitaqartut, sulinermik isertitaqalernissaat sulissutigisariaqartoq, IA-p politikikkut oqaaseqartartua isumaqarpoq:

- Sulilluni aningaasarsiornissaq soqutiginarnerusariaqarpoq. Pissarsinarnerusariaqarpoq.