IA aamma Siumut: Atassut ilumuunngilluinnarpoq

Issittumi sakkutooqarfiup inissinneqarnissaanut tunngatillugu Inuit Ataqatigiit Siumullu marloqiusamik nipeqarnerarlugit ullaaq radioaviisimi Steen Lyngep oqarnera, partiinit pineqartuniit akerlilerneqarpoq. Ilaatigut Steen Lyngep partiit pineqartut pasillerpai, namminiilivinnermik sorsuutiginninnerarlugit, illuatungaatigulli aamma issittumi sakkutooqarfiup inissinnissaanut sorsuutiginninneq pillugu marloqiusamik oqarnerusoq. Tamannalu ilumuunngilluinnartoq partiiniit oqaatigineqarpoq.

Partiit Inuit Ataqatigiit aamma Siumut oqaaseqartippavut:

- Taamaattoqanngilaq erseqqissorujussuarmik Siumut isumaqarpoq, tassalu namminersulivinnissamut ingerlagaluarlutaluunniit suli ulloq taanna tikinnginnatsigu pisussaaffeqarpugut politikkikkut pingaarutillit ingerlatissallugit, Siumup siulittaasua Aleqa Hammond oqarpoq, nangillunilu oqaatigalugu partiitut pitsaanerpaaq tunngavilersorluagarlu pingaaruteqarluinnartoq anguneqassappat suleqataanissaq pingaaruteqarluinnartoq, kiisalu nunatsinnut pitsaanerpaaq aatsaat anguneqarsinnaasoq sunniuteqartumik ingerlatseqataanikkut.

- Oqartoqaannarsinnaanngilaq namminiilivikkusukkassi sussa isummersueqataaqinasi, taamatut oqartoqassappat namminiilivinngisaannassaagut. Taamaattumik utertitsiffigilaarusuppara oqarfigalugu, namminiilivinnissaq taamaallaat anguneqarsinnaavoq nunatsinni tunngassuteqartut annerpaamik sunniuteqarfigalugit ilusilersueqataaffigalugillu, aatsaat taamaaliornikkut anguneqarumaarpoq Aleqa Hammond oqarpoq.

Inuit Ataqatigiinniit Aqqaluaq B. Egede isumaqarpoq namminiilivinnissamut ullumikkut killiffik assersuutigissallugu mianersuuttariaqartoq, maannamullu namminersorlutik oqartussaanermiit namminersornermut akuerisimasarput maanna piareersarlugu ingerlakkipput. Taamaattumillu ullumikkut namminiilivinnissaq uuttuutigalugu oqallinneq sanilliuttaqattaarnissaa mianernartuusoq.

- Namminersorneq naammassigutsigu, aningaasarsiornikkut pisinnaanngorutta. Imminullu illersorsinnaasumik nunarput ingerlassinnaalerutsigu namminiilivikkumaarpugut. Inuiaqatigiit paatsuungasumik inissinniaraanni Steen Lyngetut eqqarsartariaqarpoq, Aqqaluaq B. Egede oqarpoq, nangillunilu oqaatigalugu ullumikkut nunatsinni partiit namminiilivinnissamut tunngatillugu suleqatigiinnerat ajunngitsumik ingerlasoq, pasilliinerlu pissutissaqanngitsoq oqaatigalugu.

- Partiit tamarmik ullumikkut pissutsit qanoq aaqqiivigineqarnissaannik oqalliseqarput, suleqatigiipput. Taamaammat Steen Lyngep namminersorneq pillugu oqaaseqarnera isumaqarpunga qarsupippallaarujussuartoq, Aqqaluaq B. Egede oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat