IA aamma Naleraq suleqatigiikkunnaartut: Naleraq ataatsimiinnernut takkutinngitsoortarpoq
Inuit Ataqatigiit Nalerarlu qinigaaffimmi maanna atuuttumi ukioq ataasiunngitsorluunniit naalakkersuisooqatigeereerlutik, 2022-imi apriilip aallartinnerani suleqatigiikkunnaarput.
Naalakkersuisooqatigiikkunnaarneq Inuit Ataqatigiit tigussaasumik oqaasertalernikuunngilaat. Naleqqalli anisitaasimanertik isertuanagu taamanikkumiilli oqaatigisarpaat.
Nalunartuali peeruppoq.
Suleqatigiikkunnaarneq Inuit Ataqatigiit siulittaasuata tulliata Aqqaluaq B. Egedep Oqalliffimmut januaarip qulingani nassuiaatigaa:
- Taamaaliorpugut taamanikkut Naalakkersuisuni ataatsimiittarpugut Partii Naleqqap siulittaasuata narrassimaarluni Naalakkersuisut ataatsimiinneranulluunniit takkunneq ajormat, ataatsimiinnerit ilaannut, Aqqaluaq B. Egede taama oqarpoq.
Ataatsimiinnerit pillugit isumaqatigiinnginneq
Pele Brobergip, Inuit Ataqatigiinnit taama oqartoqarnera Oqalliffimmut oqaasertalerusunngilaa. Naatsumilli ima oqarpoq:
- Kisianni neriuppunga ataqqilaassagaat anngaasussiaanngitsugut uagut, Pele Broberg oqarpoq.
Hans Enoksen apriilimi 2022-mi Naleqqami siulittaasuuvoq. Suleqateqarunnaarnerminni naalakkersuisooqatigiit piffissami sivisuumi ataatsimeeqatigiissimanngitsut KNR-mut taamani oqarpoq.
Brobergip naalakkersuisooqatigiinnut ataatsimiigiartarunnaarnera nalaatsorneriinnaanngitsoq Aqqaluaq B. erseqqissaavoq:
- Asuliinnaanngilaq Partii Naleqqap suleqatigiunnaarneqarnikuunera. Aamma oqallinnerni allatut isumalinnut naalaarsinnaannginneq, parteeqatiginngisanut akeqqersimaarneq.
Inuit Ataqatigiit Siumumik kingusinnerusukkut, qinigaaffiup sinnerani atuuttumik, naalakkersuisooqatiginnilerput. Inatsisartunut kingusinnerpaamik 6. Apriili qinersisoqassaaq.
