Isumaginninnermut ministerip angajoqqaanut misiliissutaasartut oqaaseqarfigigai Meeqqat allamut nuutinneqartut angerlarsinnaalerataannaasut
-Danskit naalakkersuisuisa avaqqunneqarsinnaanngitsumik kalaallit sullinneqartillugit, kulturiannik oqaasiannillu paasisimasalimmik atuisalernissamik suliniutip qaamatip tulliani februarimi inatsisissatut siunnersuut saqqummiutissavaat.
-Ilaatigut meeqqanik arsaarinnittarnermi aallaaviusimasoq atorunnaarsinneqassasoq, isumaginninnermut ministerip oqaatigaa.
Sophie Hæstorp-Andersenip arsaagaareersimasut pillugit kingumut misissuisoqarnissaanik aalajangiusimavoq.
Misissuutit atorunnaarsinneqartut aallaavigineqarmata, ilumut suliani eqqortumik aaliangiisoqarsimanersoq qulakkeerinnissutaassaaq:
Suliarineqareersimasut aalajangiiffigineqareersullu misissorluarneqassasut
Angajoqqaat namminneq meeqqap allamiilernissaanik akuersaarsimagaluarpataluunniit, misileeriaatsit aallaaviusimappata, aamma taakku iluamik misissuivigineqarnissaat anguniarneqarput.
-Meeqqat allamut nuutinneqareersut 460-iupput. Taakku ilai angajoqqaavisa namminneq akuersinerisigut allamut nuutinneqarput. Taakku ilanngullugit itisilerlugu misissuiffigineqassasut, Sophie Hæstorp-Andersen oqarpoq.
Danskit isumaginninnermut Ineqarnermullu Naalakkersuisuata Sophie Hæstorp Andersenip tallimanngormat tusagassiorfinnut nalunaarutaa tupaallaatigineqarpoq.
Nalunaarummi allaqqavoq danskit komuuniisa misissuutit pineqartut atorunnaassagaat.
Tupaallaatigineqarpoq peqqutigalugu Sophie Hæstorp Andersenip sapaatit akunnerisa siuliani ersarissumik inatsimmik allannguinisssaq ajornarnerararmagu. Tamannalu eqqarsaat mumittoq paasinarsivoq.
-Taama suliniuteqartoqarnera pilluaammernartuuvoq, polikkinullu tunngasunik suliaqataleramali aatsavissuaq qullilivunga, ukiorpassuimmi anguniagaq kiisami anguneqalerpoq, IA-meersoq Folketingimi ilaasortaq Aaja Chemnitz nutaarsiassaqartitsivik Ritzaumut oqarpoq.
Trumpip anguniagai sunniisut
Donald Trumpip piffissami kingullermi anguniagai ilaatigut nunatsinnut tunngasut pillugit Sophie Hæstorp Andersenip suliaminik sunnerneqarnini nassuerutigaa.
-Soorunami naalagaaffeqatigiinneq pineqarmat avissaartuutsitsiniartoqarmallu eqqummaariffigaarput. Pingaarnersaavoq kalaallit angajoqqaavisa annernartumik meeqqaminnik arsaagaasarnerat aaqqiivigineqarnissaa, taamaattumik tunngavissaqarluartumik sulisoqarnissaa pingaartikkitsik, Sophie Hæstorp Andersen oqarpoq.
