Hvideruslandimi præsidenti nunanit allanit akuleruffigeqqunngitsoq

- Nunarput nunanut allanut akisussaaffiliutsinnianngilarput. Nunanit allaneersunit oqartussat akuliunissaat pisariaqartinngilarput, Lukasjenko oqartoq nutaarsiassaqartitsivik Belta taama allaaserisaqarpoq.

Lukasjenko illuatungiliuttullu aporaanneranni Litauen, Polen Letlandilu naaperiartitsiumallutik akunnermiliunnissaminnut neqerooraluarput.

Hvideruslandip illoqarfiisa pingaarnersaani Minskimi illuatungiliuttunut tapersersuisut akerliussutsimik takutitsinertik ullumi nangeqqippaat. Sapaatiummat qinersinerup inerneri taakku akerliuffigaat.

Akerliussutsimik takutitsisut politiillu ataasinngormat aporaanneranni 34-nik ukiulik toquvoq. Arfininngornermilu akerliussutsimik takutitsisut 34-nik ukiullip toqquianut naasortaliipput.

AAMMA ATUARUK EU Hvideruslandimi pisunut akuliuttoq

Akerliussutsimik takutitseqataasut ilaat alla politiinit tigummineqarallarnermini toqusimasoq aamma uppersarneqarpoq, nutaarsiassaqartitsivik Ritzau taama allaaserisaqarpoq.

Hvideruslandimi pisut Bruxellesimit malinnaavigineqarput. Hvideruslandimi atorfilittat akerliussutsimik takutitsisunut sakkortuuliornerat kinguneqartinniarneqaleruttorluni.

EU-mi nunanut allanut tunngasunut ministerit ippassaq taama paasissutissiipput.

Qinersineq "kiffaanngissusilimmik pissusissamisoortutullu" pinngitsoq EU-p isornartorsiorpaa politiillu sakkortuallaaliornerarlugit.

Qinersisoqareernerani akerliussutsimik takutitsisut ikinnerpaamik 6700-t tigusarineqarput.