Kalaallit nunani allaniittut: Qinersisinnaasut allattorsimaffianniilernissat nalunaarutigiuk - ullumi
Naqqiut: Paasissutissat allaaserisami uani najoqutarineartut Sullissivik.gl-imeersuupput. Paasinarsivorli, paasissutissat taakkua eqqunngitsuusut. Taamaammat allamik nutaamik allaaserisaqarpugut, taannalu nittartakkami uani atuarsinnaavat.
Tamanna Inatsisartunut qinersisinnaatitaarneq pillugu malittarisassani, Sullissivik.gl-imi atuarneqarsinnaasuni, ersippoq.
Qinersisoqarnissaa nalunaarutigineqarpat, qinersinermut siulersuisut qinersisinnaasut allattorsimaffiannik sanassapput.
AAMMA ATUARUK Kielsenip qinersisoqarnissaa suaarutigaa
Innuttaasut, nunatta avataaniikkallartut, qinersisinnaapput. Qinersissagunilli kommunimi najugarisaminni qinersisinnaasut allattorsimaffiannut qinersinissaq sapaatit akunneri arfinillit sioqqullugit ilanngunneqarsimasariaqarput.
Qinersisinnaasut allattorsimaffiat
Qinersinissaq sioqqullugu sapaatit akunneri pingasut sioqqullugit kommunip inuit allattorsimaffiutaa malillugu najugaqarfigisimasanni kommunimi, qinersisinnaasut allattorsimaffianni allanneqarsimassaatit:
- Qinersinissaq kingusinnerpaamik sapaatit akunnerinik pingasunik sioqqullugu kommunip inuit allattorsimaffiutaanut nuunnerit nalunaarutigisimagukku, najugaqarfittaanni qinersisinnaasut allattorsimaffiannut allanneqarsimassaatit
- Qinersinissaq sapaatit akunnerinik pingasunik sioqqunnagu kommunip inuit allattorsimaffiutaanut nuunnerit nalunaarutigisimagukku, manna tikillugu najugaqarfigisanni qinersisinnaasut allattorsimaffianni allanneqarsimassaatit
- Kalaallit Nunaata avataani najugaqarallarsimaguit qinersisinnaatitaallutilli, manna tikillugu najugaqarfigisanni qinersisinnaasut allattorsimaffianni allanneqarsimassaatit. Ulloq qinersivissaq sioqqullugu kingusinnerpaamik sapaatit akunnerinik arfinilinnik sioqqutsisumik, qinersisinnaasut allattorsimaffiannut ilanngunneqarnissat qinersinermut siulersuisunut qinnuteqaatigissavat
- Kommunit aggornerisa avataanni ikkuit, Kommuneqarfik Sermersuumi qinersisinnaasut allattorsimaffiannut allanneqarsimassaatit
Sullissivik.gl
Qinersinissarli suli ullulerneqanngimmat, kisiannilu aamma Naalakkersuisut siulittaasuannit, Kim Kielsenimit, apriilip 17-iani 24-aniluunniit pisussaasutut nalunaarutigineqarmat, nunatta avataaniittut qinersisinnaasut allattorsimaffiannut ilanngunneqarnissartik nukinngutigisariaqarpaat.
Tassami ullumi apriilip 17-iata tungaanut sapaatit akunneri arfineq arfiniliupput - tassa ullumi marsip arfernani.
18-iliisimanissap sanitigut Nunatsinni qinersinissaq sapaatit akunnerinik pingasunik sioqqullugu najugaqarsimanissaq piumasaqaataavoq.
