Hotel Arctic aatsaat taama angusarissaartigisoq
Angusat suli akileeraarusernagit 3,4 millionit koruuniupput, angusat aatsaat pitsaatigisut Hotel Arcticip pisortaanerata Erik Bjerregaardip tusagassiuutinut nalunaarummi allaaseraa.
Ilulissanut takornarniat amerliartornerat naatsorsuutit pitsaasuunerannut pissutaaqataapput. Takornarniat Ilulissani unnuisartut 2011-mit 2015-imut 62 procentinik amerleriarsimapput, pingaartumillu 2015-imi amerleriarsimasut Bjerregaardip oqaatigaa.
Ilulissanut takornarniat ukiup ingerlanerani amerlanerpaasarfiisa ilaatigut sivikittarsimanerat unamminarsimasoq Hotel Arctic pisortaanerata oqaatigaa, takornarniallu ukiup ingerlanerani ikinnerpaaffigisartagaanni Ilulissanut tikittut, tassa juunip qaammataata tungaanut, oktobarillu kingorna ukiut ingerlanerini aamma amerliartulaarsimanerat Erik Bjerregaardip nuannaarutigaa.
Aamma atuaruk Ilulissani akunnittarfik ajunngitsup tungaanut aallartoq
Nittarsaassilluarneq, timmisartullu aqqutigisartagaasa nutaat takornarniat amerliartornerannut pissutaaqataapput.
- Nunanit allaneersut, pingaartumik Islandimeersut Ilulissani takussaanerulersimapput, takornarniallu Asiameersut USA-meersullu amerlanerit tikittalernissaat neriuutigineqarpoq, Visit Greenlandip sulilluarneratigut takornarniat tassannga amerlinissaat neriuutaalluni, Erik Bjerregaard oqarpoq, timmisartummi aqqutigisartagaasa nutaat atuutilernerisigut takornarniat amerlinerunissaat neriuutaagami.
Init unnuiffissat nutaat tallimat Hotel Arcticip ukioq manna juunip aallaqqaataani aamma ammassavai, init unnuiffigineqarsinnaasut taamaalinikkut katillugit 95-inngussallutik.
