Ilulissani akunnittarfik ajunngitsup tungaanut aallartoq
Ilulissani Hotel Arcticip, Air Greenlandip pigisaanut ilaasoq, ataatsimeersuarnerminni ukiuni 30-ni ingerlareerluni maannamut takornariaqarnermi ukioq ingerlalluarnerpaasoq saqqummiuppaat.
2014-mut naatsorsuutit Air Greenlandip martsimi ataatsimeersualerpat aatsaat saqqummiunneqassapput, tusagassiortunullu nalunaarutigaat Hotel Arcticip ukiumut nalunaarusiaa naammaginartutut nalilerneqartoq.
2009-mi aningaasarliorneq malunniummat unnuisut ikileriareersut, 2010-miit ukioq kingulliup tungaanut ineriartorneq mumissimavoq. Ukiuni sisamani unnuisut 45 procentimik amerlipput, 2012-miilli amerleriarnerit annertullutik.
Tusagassiutinullu nalunaarummi allassimavoq, Iluliarmiunut nuannaarutaasoq, siuariartorneq ukiup ilaani unnuisukiffiusuni pisimammat, tassa juunip qaammataata tungaanut aammalu oktobarip kingorna.
