Hospice-mik pilersitsinissaq misissoqqinniarpaat

Atassut sinnerlugu Inatsisartunut ilaasortat Siverth K. Heilmann aamma aamma Knud Kristiansen kiisalu Siumeersoq Doris Jakobsen Nunatsinni hospicemik, tassa toqujartortut eqqissillutik najugarisarsinnaasaannik, pilersitsoqarnissaanik siunnersuuteqartuupput.

Kisianni nunarput angeqimmat taamatut pilersitsoqaraluartorluunniit inuit ilaasa qanigisatik qimallugit hospice-miittariaqartalersinnaanerat naalakkersuisunit tulluartuusorineqanngilaq.

- Naalakkersuisunit pingaartutut isigineqarpoq toqujartortut allatut iliortoqarnissaanik pisoqarsimatinnagu, avatangiisiminni sungiusimasaminniiginnarnissaat sapinngisamillu annertunerpaamik inuunerup naajartornerani qaninnerpaamik ilaquttaminnik ilaqartuaannarnissamut periarfissaqartuarnissaat, Peqqissutsimut naalakkersuisoq Agathe Fontain akissuteqaammini allappoq.

Taassuma siunnersuutigaa siunnersuut itigartinneqassasoq, imatulli paasineqassanngilaq toqujartortut sapinngisamik isumagineqarluarlutik toqqissimasumillu inissiffissaqarnissaat anguniarneqarunnaartoq. Siunissamilu siunertamut tassunga pilersinneqarumaartussaq imaassinnaavoq hospice-unngitsoq.

- Pingaaruteqarpoq peqqissaartumik misissuisoqarnissaa pisariaqartitsinerit, periarfissallu qulaajassallugit kommuniniittut aamma peqqinnissaqarfiup illuutigisaaniittut aaqqissuussaaneriniittullu, najukkanilu aaqqiisinnaanermut periarfissat, Agathe Fontain oqarpoq.

Siunnersuut siullermeerlugu Inatsisartut oqaluuserissavaat pingasunngorneq oktoberip qulingat.