Politikki

Holst: Kangilinnguit oqaluuserineqarnikuupput

Kangilinnguani illut sanaartukkallu allat Siumut sinnerlugu Folketingimut ilaasortap Aleqa Hammondip siunnersuutigisaatut Namminersorlutik Oqartussanut tunniunneqarnissat, danskit naalakkersuisuinit isumaqatigineqarpassinngilaq.

Allattoq Inge S. Rasmussen, Jens Thorin

septembarip 17-at 2015 13:29

Tamannalumi politikerimut immaqa tupaallaataanngilaq.

Taama qaammat kingulleq siunnersuuteqaannartoq Folketingimi ilaasortaasimasumit Doris Jakobsenimit isornartorsiorneqarpoq, Aleqa Hammondip parteeqatai Kangilinnguani sanaartukkat ataannarnissaannik ilungersorsimanerannik eqqaasitsinneqarluni.

Aamma atuaruk VIDEO Kangilinnguit pillugit Aleqa isornartorsiorneqarpoq

Aamma IA-mi kommuneqarfik Sermersuumi politikerit isornartorsiuipput.

Aamma atuaruk Kangilinnguit isaterneqarnissaa Hammondip unitsikkusuppaa

Aamma illersornissamut ministerip Carl Holstip Aleqa Hammondimut akissutimini erseqqissarpaa, Namminersorlutik Oqartussat Kommuneqarfik Sermersoorlu, sakkutooqarfiup siunissaannik misissuisoqarnissaa siusinnerusukkut akuersaareeraat.

Tamatumani aamma sakkutooqarfiusimasumi sanaartukkat pisortat suliffeqarfiutaasa arlaata tigorusunneraat misissorneqarluni.

Kisianni kalallit qallunaalluunniit oqartussaat soqutiginnissimanngitsut, Carl Holst Aleqa Hammondimut akissummini allappoq.

- Namminersorlutik Oqartussat Illersornissamut ministereqarfimmut taamani nalunaarpoq, Nunatsinni pisortat oqartussaqarfii Kangilinnguanik tigusinissamik soqutiginninngitsut.

- Aamma Danmarkimi oqartussaqarfiit aperineqartut soqutiginninngillat, ministeri akissummini allappoq.

taassuma aamma tikkuarpaa, Kangilinnguit tamanut tuniniarneqaraluarmata soqutiginnittoqanngitsoq. Tamannalu Namminersorlutik Oqartussat Kommuneqarfik Sermersuullu aamma nalunngilaat.

Aamma atuaruk Kangilinnguit periarfissanik ulikkaaraluarpoq