Kangilinnguit periarfissanik ulikkaaraluarpoq
![](/sites/default/files/styles/image_934x467/public/article_images/groennedal_forside.jpg?itok=SRtmFtOv)
- Takornariafissatut, ilisimatuut misissuiffissaattut, ilinniartoqarfittut, timersornermi højskolerfissatut, pinngortitalerinermut imaluunniit meeqqanut sumiginnarneqarsimasunut ilinniarfeqarfinngortinnissaanut piukkunnaateqarluaraluarpoq, Peter Barfoed oqarpoq.
Grønlands kommando 2012-imi Arktisk kommandonngorpoq. Tassungalu atatillugu Kangilinnguani sakkutooqarfik Nuummut nuunneqassasoq, folketingimi 2011-imi aalajangiunneqarpoq.
Pisiariumaneqanngilaq
Kangilinnguani illorpassuit 2012-imi tuniniarneqalerput. Pisiarinnikkumasunulli piumasaqaatinut ilaavoq Kangilinnguani pinngortitamik mingutsitsineq salinneqassasoq. Naak neqeroorut akikikkaluartoq pisiariumaneqanngilaq.
Taamaammat danskit naalagaaffiata saliinissaq akilertussanngorpaa. Saliinissaq ukiup tulliani aallartinneqassaaq.
Folketingimi ilaasortaq Siumumeersoq Aleqa Hammond, danskit illersornissaqarnermut ministeriannut apeqquteqaateqarpoq, danskit Kangilinnguani sakkutooqarfeqarnikuunerminnut qujassutitut tassani illorpassuit Naalakkersuisunut tunissutigissannginneraat. Saliinissarli danskit naalagaaffiannit aningaasartuutigineqassasoq, Aleqa Hammond isumaqarpoq.
Læs også Kangilinnguit isaterneqarnissaa Hammondip unitsikkusuppaa
Kommuneqarfik Sermersuumi sanarfinermut, avataangiisumullu ataatsimiisitaliami siulittaasoq, Mille Søvndahl Pedersen isumaqarpoq Kangilinnguit pillugu suliaq naammassereersoq.
Taamaattumik folketingimi ilaasortap taama kingusitsigisumik qisuariaateqarmat tupigusuutigaa.
- 2013-imi Aleqa Hammond siulittaasuugallarmat allagarsinikuuvugut Kangilinnguit matuneqarlersoq iluatigineqanngimmat. Soorunami periarfissaqarsimagaluarpoq Naalakkersuisut siulittaasutut iliuuseqarsinnaalluni, Mille Søvndahl Pedersen oqarpoq.