HFO-p Issittumi inerteqqutaalernissaanut Danmark tapersiinissamut nangaasoq

Naalakkersuisut Issittumi angallannermi HFO-p, tassa uuliap kinertup, inerteqqutaalernissaanut tapersiiniarlutik nalunaaruteqarnerannit qaammat ataaseq sinnerlugu qaangiutereeraluartoq, Danmarkimi avatangiisinut ministeri nalunaarummut oqaaseqanngilaq.

KNR-ip ministeri aperaa, nunatta inerteqquteqalernissamut tapersiinera, Danmarkip inerteqquleqaleratarnissamut isummernissaanut qanoq isumaqarnersoq. Nunattali tapersiinera Danmarkimiit maannamuugallartoq qisuariarfigineqanngilaq.

Inerteqquteqalernissamut oqallinneq naalagaaffiit peqatigiit imarsiornermut suleqatigiiffiani pisarpoq. Nunat qassiiusut inerteqquteqarnissamut tapersiinertik nalunaarutigereerpaat.

AAMMA ATUARUK Naalakkersuisut HFO inerteqqutaalissanersoq ersarissumik akissuteqarfigisariaqarpaat

Danmarkip nunatta isumaa siullermik 2016-imi tusarniarpaa, nalunaaruteqarnissaalu utaqqigamiuk inerteqquteqarnissamut tapersiinissamut tunuarsimaarnikuuvoq. Taamani ima oqaasertaqarpoq: “Danmarkip apeqqummut isumaanik aalajangersaanissamut Kalaallit Nunaata siunnersuummut tamatumunnga qanoq isumaqarnera uatsinnut soorunami pingaaruteqarpoq.”

Tassalu naak Danmark ukiunit marlunni sivisunerusumik nunatsinniit akissutissamik noqqaareeraluarluni suli qisuariaateqanngilaq.

KNR-ip Avatangiisinut ministeri, Jakob Ellemann-Jensen septembarip 20-anili oqaaseqartinniarsarigaluarpaa.

Kalaallit Nunaata inerteqquteqalernissamut tapersiinerata, Danmarkilu inerteqqummut tapersiissanersoq tapersiissannginnersorluunniit oqaaseqarfiginissaanut IMO-mit misissuinerit allat utaqqillugit Avatangiisinut ministereqarfimmi tusagassiisartut kingullermik nalunaarutigaat.

AAMMA ATUARUK RAL sejler på HFO herhjemme - men ikke andre steder