VIDEO Henrik Thomsenip kinguaassiutitigut atornerlugaanerup oqaluuserinissaa paquminarunnaarsippaa

29-nik ukiullip nalunngilaa kisimi atornerlugaasimanani, taamaammat pingaarutilimmik pisoqarfiusumik Facebookimini marsip 10-ani allappoq: 

- Paqumigineqartoq. Inuit eqqartorneq ajugaat. Meeqqanik atornerlueqartarnera oqaluuserissallugu paqumigineqarnerpaanut ilaavoq, ingammik nukappiaqqat atornerlugaasimasut.

- Nukappiaqqanut taamaattunut ilaavunga... 

Oqaluttuani taama aallartippaa. Sapaatip akunnera ataaseq qaangiutereeersoq, tigulluarneqareersorlu, Qanoruumit apersorneqarpoq.

- Isertugaatip oqaluttuarinera iluaqutaavoq.

- Taamanikkulli kanngugisarsimavara oqaluttuarinissaalu sapertarlugu. Allanngortissinnaagaluarakku taamanikkulli oqaluttuarisimassagaluarpara. Uangalu pisuussuteqarnanga paasisimassagaluarlugu, Henrik Thomsen KNR-imut oqarpoq, neriullunilu  oqaluttuarnini atornerlugaasimasut allat iluaqutigissagaat. 

Taamaammat Sermitsiaq.ag-kkut atuartartunik isertugaat paqugineqartoq pillugu sisamanngormat chatteqateqarpoq.

- Ikinngutigisamma ilaat uattulli atornerlugaasimasoq allariasaarmat tuparujussuarpunga, Henrik Thomsen oqarpoq, qulliliileramilu unillatsiartariaqarluni. 

Aamma atuaruk VIDEO Kielsenip meeqqat atugarisaat oqaluuseralugit qullipitsitsivoq

Tapersorserneqarluarpoq

Oqaluttuarninili eqqortumik iliornerusoq nalunngilaa. Imminerminut oqiliallaataanerata saniatigut  inuppassuarnit qujamasuttunik saaffigineqarsimavoq.

- ilimagisimanngikkaluarpara, atornerlugaasimasut, taama amerlatigisut, uannut allakkususasut, nukappiaqqat niviarsiaqqat inersimasullu.

Aamma atuaruk Atuagaq ilinniut MIO-mit saqqummiunneqarpoq

Aamma atuaruk Kinguaassiuutitigut atornerlunneqarsimasut inuunermi sinnera kingunipilutsitsisarput

Allaqatigisaasa ilaata oqaluttuara, angajoqqaaminut oqaluttuarsimagaluarluni nipangersarneqarsimallunili. Taamaammat Henrik Thomsenip saqqummernini  siunertaqartoq takulluarsinnaavaa. 

- Nalunngilara kisimiinnanga aamma taamatut misigisaqarsimasut kisimiinngillat neriuppungalu takusinnaalissagaat, Henrik Thomsen oqarpoq.

Henrik Thomsenip saqqummernera Facebookiani tiguneqarluarsimasoq ersarippoq, ilaatigut aamma ilaqutariinnermut, naligiissitaanermut isumaginninnermullu naalakkersuisup, Martha Lund Olsenip, naasunik kortimillu nassissimallugu, saqqummerneranik qujaffigalugu. 

Aamma atuaruk  VIDEO Kinguaassiutitigut atornerlugaasimallutik nalunaarutiginnittartut amerleriartut