Kinguaassiuutitigut atornerlunneqarsimasut inuunermi sinnera kingunipilutsitsisarput
Meeqqat arfineq marlunnik ataalluguluunniit ukiullit 7 procentii kinguaassiuutitigut atornerlugaasimasut nalunaarusiami "Kalaallit Nunaanni inuusuttut"-mi atuarneqarsinnaavoq.
Meeqqanik atornerluisarneq nunatsinni ajornartorsiutaavoq annertooq. Meeqqallu taama pineqarsimasut inuunermi sinnerani innarlerneqartarput. Meeraalluni arlaleriarluni kinguaassiuutitigut atornerlugaasarsimasoq inersimasunngoreeraluarluni kingunipilui ulloq manna tikillugu suli atugarai. Oqaluttuartoq kinaassutsiminik isertuusserusuppoq KNR-imili tusagassiortup kinaassusaa ilisimavaa.
- Eqqarsartaqaanga. Sooq uanga meeraallunga minguinnerpaallunga taassuminnga angummit taama pineqarlunga?, Arnaq kinaassutsiminik isertuusserusuttoq KNR-imut taama oqaluttuarpoq.
Aamma atuaruk Kinguaassiutitigut atornerluisoq aamma ikiorneqassaaq
Ukiorpassuit qaangiutereeraluartut meeraalluni misiginikuusai ullumikkut inuuneranut nuanninngitsumik suli sunniuteqartarput.
- Soorlu imminut arnatut nuanniigillunga. Ilaanni imminut qiviarusunnanga tarrarsuummut. Timera maajugalugu.
Aamma atuaruk Meeqqat illersuisuat: - Meeqqat illersornissaannut iliuutsivut annikippallaarput
Kinguaasiuutitigut atornerlunneqarsimanerup kingunipilui inuunerup sinneranut unammillernarsinnaasartut, naalakkersuisut angalaqatigiittartuini katsorsaasartuni suleqataasup, tarnip pissusaanik ilisimasallip Heidi Lindholmip oqaatigaa.
- Kingunipiluusinnaasut sakkortupput. Kinguaassiuutitigut atornerlugaasimanerup kingunerisaanik timimut eqqarsaatinullu mattunneqaqqasutut misigineqarsinnaavoq. Inuunerup pilluarnassusai tappiiffigilerneqarsinnaasarput nuannaarnissarlu ajornarnerulerluni. Imminut pisuutinneq, imminut naleqartinnginneq, ajukkuusaarneq kanngusunnerlu ilaatigut misigineqartarlutik.
Aamma atuaruk Naaja: Pinngitsaaliilluni arnerinerni qaffasinnerpaajuvugut - kanngusuttariaqarpugut
Nunatsinni kinguaassiuutitigut atornerluisarnerup takornartaannginnera assigiinngitsorpassuarnik peqquteqarsinnaasoq, tarnip pissusaanik ilisimasalik aamma oqarpoq. Ataatsimullu isiginiassagaanni inuiaqatigiinni naligiinnginnerujussuaq peqqutaaqataasoq taanna isumaqarpoq.
Inuiaqatigiinni ajornartorsiuterpassuit ajornartorsiutip annertuneranut peqqutaaqataapput. Atornerluisuuneq, persuttaasarneq, aningaasakilliorneq naligiinnginnerujussuarlu ajornartorsiutinut ilaapput.
Nunatsinni ajornartorsiut annertoqisoq aaqqinniarneqanngippat nunatta siuariartornissaa inuisalu peqqinnartumik inuuneqarnissaat unammillernarsinnaassasoq, Heidi Lindholm isumaqarpoq.
- Nunarput tamaat isiginiassagutsigu ajornartorsiutip sunniutai tassaasinnaapput, atornerlugaasimasup innarlerneqarnerata kingunerisaanik ilinniagaqarsinnaannginneq suliffimmilluunniit paarsisinnaannginneq. Taamaasilluni inuiaqatigiinnut aamma artukkiisinnaavoq, tarnip pissusaanik ilisimasalik, Heidi Lindholm oqarpoq.
