Atuagaq ilinniut MIO-mit saqqummiunneqarpoq

Meeqqat kinguaassiutitigut atornerlunneqartartut Nunatsinni amerlavallaaqaat.

Meeqqat pisinnaatitaaffiinik sullissivimmit MIO-mit taama isumaqartoqarpoq, Naalagaaffiit Peqatigiit Meeqqat pisinnaatitaaffii pillugit ullumi tallimanngornermi ullugititaannut atatillugu, meeqqat atuarfiini atuaqatigiiaat ukiup sisamassaanni, tallimassaanni arfinilissaannilu atuartunut ilinniutissamik atuakkamik Nunatta atuarfiinut nassiussuillutik.

- Meeqqat pillugit isumaqatigiissummi artikel 19-imi, meeqqat tamarmik annersarneqarnissamut, ajoquserneqarnissamut atornerlunneqarnissamullu illersorneqartussaapput. Uumalu atuakkap siunertaasa ilagilluinnarpaat, meeqqat timertik pigimmassuk, taavalu aamma killiliisinnaassuseqarnissamut ilinniartinneqarnissaat, Meeqqat Illersuisuat Aviâja Egede Lynge oqarpoq.

Aamma atuaruk Ilinniartitsisut meeqqat pisinnaatitaaffiinik ilinniartitsissapput

Killiliisinnaanissamut ilinniut

Meeqqallu kinguaassiuutit qanoq atortarnerat ilikkarnissaat, soorlu aamma isertugaatit qanoq pineqartarnerat atuakkap qaammarsaatigissallugu siunertarigaa, Meeqqat Illersuisuat nassuiaavoq. Atuartullu taama ilinniartinneqarpata kinguaassiutitigut atukkat suut ajunnginnersut, suullu ajortuunersut ilikkarsinnaagaat, Aviâja Egede Lynge isumaqarpoq.

- Inuup nammineq seksualitetianut tunngavoq. Soorlu inuup nammineq sananeqaatimini seksualiteteqarnera, tassungalu atatillugu aamma killiliisinnaassuseqarnissaq, Meeqqat Illersuisuat oqarpoq.

Pisariaqarluinnartoq

Atuagaq ilinniut atuarfinnut tamanut nassiunneqaraluarluni, atuarfiit ilinniartitsissutigissanerlugu namminneq nalilissavaat. Atuakkamili sammineqartut meeqqanut ilinniartitsissutigineqarnissai pingaaruteqarluinnartut, Meeqqat Illersuisuat isumaqarpoq.

- Pisariaqarluinnarpoq. Nalunngilarpummi Nunatsinni meerarpassuit ajoraluartumik suli kinguaassiutitigut atornerlunneqartartut. Aamma ilisimagaluarlugu iliuuseqartariaqaratta. iliuuseqarnerlu uani pitsaanerpaat ilagisinnaavaat, meeqqaninngaanniit aallartinneq. Tassa meeqqat killissaminnik ilinniartinneqarnerat. Soorunami meeqqat kisimiillutik taanna akisussaaffiginngilaat, kisiat taamaalillugu aamma iliuuseqarnissamut aqqutissiuivugut, Aviâja Egede Lynge oqarpoq.

Nunaqarfiit nersornaaserneqartut

Atuakkap atuarfinnut nassiussorneqarnerata saniatigut, MIO Naalagaaffiit Peqatigiit Meeqqat pisinnaatitaaffii pillugit ullugititaat malunnartinniarlugu, meeqqat pisinnaatitaaffii pillugit immikkut nersornaaserneqarput. Ukioq mannalu nunaqarfiit pingasut nersornaarserneqarput, tassaallutik Kitsissuarsuit, Akunnaaq aamma Ikamiut.

Aamma atuaruk MIO nersornaasiuttakkaminut piukkunnartussarsiortoq