Henrik Dam Kristensen Folketingimi siulittaasunngussaaq
Folketingimi siulittasunngortussaq siulittaasutullu inissisimasussat partiini allaneersut sisamat taaguunneqarnerpaasimasut, Folkertingimi ilaasortanngortunit aqagu tallimanngornermi toqqarneqassapput.
- Folketingimi partiinit tamanit ippassaq taperserneqarpunga, tamaattumik Henrik Dam Kristensenip siulittaasunngortussanngornera nuannaarutigaara, Mette Frederiksen oqarpoq.
Folketingimi siulittaasunngortussap Pia Kjærsgaard ukiuni kingullerni sisamani siulittaasuusimasoq kingoraassavaa.
62-nik ukiulik, Henrik Dam Kristensen Folketingip siulittaasoqarfiani siulittaasup tulliatut maanna inissisimavoq.
Henrik Dam Kristensen Poul Nyrup Rasmussenip Helle Thorning-Schmidtillu staatsministeriunerisa nalaanni ilaatigut Isumaginninnermut Suliffeqarnermullu ministeriusimavoq.
- Christiansborgimi ukiorpassuarni misilittagaqarpoq, illuatungiliuttuni inissisimasarsimavoq naalakkersuisunilu ilaasortaasarsimalluni - inuk eqqissisimasuuvoq silatusaartuullunilu, aamma partiinut mikinerusunut angisuunullu inissaqartitsisarluni, Mette Frederiksen oqarpoq.