Folketingimut qinersieq 2015 Helle Thorning-Schmidt statsministeritut tunuarpoq

Socialdemokratit siulittaasuata Helle Thorning-Schmidtip, ministeriunertut tunuarnini nalunaarutigiartorlugu maanna dronningimeereersimalerpoq.

Taassuma partiia talerperliit partiivinut Lars Løkke Rasmussenimit siuttuuffigineqartunut ippassaq qinersinermi ajorsareersorlu tamanna pivoq.  Nutaanik naalakkersuisunngortitsinissamut isumaqatigiinniarnerit taamaalilluni taassuma Lars Løkkemut isumagisassanngortippai.

Danmarkimi kunngikkormiunit tusagassiuutinut nalunaarutigineqartoq naapertorlugu kunngikkormiunit partiit sinniisui qinnuigineqarput naalakkersuisunik pilersitsinissaq pillugu ualimut nalunaaqutaq marlunut ataatsimeeqatigeeqqullugit.

Socialdemokratit ippassaq ajorsarnerisa kinguneranik Helle Thorning-Schmidtip Socialdemokratit siulittaasuattut tunuarnini aamma nalunaarutigaa, taanna ukiuni qulini kingullerni siulittaasuuvoq.

Socialdemokratit ilaasortaatitaat ippassaq qinersinermi pingasunik amerleriarput, maannalu Danmarkimi partiini annersanngorlutik. Partiilli Socialdemokratinik tapersersuisut naammattumik tapersersorneqanngimmata Danmarkimi pissaanermik tigumiartut allanngortussanngorput.

Socialdemokratini siulittaasup tulliata Mette Frederiksenip partiip immikkut ittumik aqagu arfininngornermi ataatsimeersuarnerani siulittaasutut qinigaanissaa naatsorsuutigineqarpoq.

Venstret siulittaasuata Lars Løkke Rasmussenip ullormi unnuamilu tulliuttumi Danmarkimi naalakkersuisunngortitsiniarluni isumaqatigiinniarnernik aallartitsinissaa ilungersunartussaassaaq. Danmarkimi tusagassiorfiit amerlasuut taama nalunaaruteqarput.

Lars Løkke Rasmussenip Danmarkimi talerperliit Folketingimi qinersinermi ajugaanerat ippassaq unnukkut nalunaarutigaa. Talerperliit 90-inik ilaasortaatitaqalermata saamerliillu 85-inik ilaasortaatitaqalerlutik, Løkke naalakkersuisunngortitsiniarluni isumaqatigiinniarnernut siuttuusussanngorpoq, tamannali ilungersunartussaassaaq.

Tassami Venstret ilaasortaatitaat 13-inik ikileriarput, Dansk Folkepartiikkulli amerleriarujussuarlutik ilaasortaatitatik 15-inik ilammata Danmarkimi partiit annersaannut tullinngorput. Partiilli taassuma naalakkersuisunngortitsinermi peqataarusunnerluni erseqqarissumik suli nalunaarutiginngilaa, taamaalillunilu partiit sorliit Danmarkimi naalakkersuisunngortitseqataassanersut suli nalunarallarluni.

Dansk Folkepartiilli siulittaasuata Kristian Thulesen Dahlip neriorsuutigereerpaa - partiini annerpaamut tullinngoraluartoq - ministeriuninngornissani kissaatiginagu, Løkkelli ministeriuninngornissaa suli tapersersorini.