Niviarsararpaat tulleriillutik nakorsamit passunneqareerlutik, taakkunannga arlallit qiallutik anisarput.

Hedvig Frederiksen nakorsamit 14-inik ukioqarluni iseqqusaanissaminut utaqqisarfimmiitilluni annilaangavoq. Nakorsamut iseruni susoqassanersoq nassuiaanneqanngilaq. Niviarsiaqqanut Paamiuni kollegiami forstanderiminnit qallunaamit taamani napparsimmaviliaqqusaasimapput.

- Taava nakorsap isertippaanga, Hedvig Frederiksen 1974-imi misigisani pillugu oqarpoq.

Hedvig Frederiksenip taama nalaataqarneraniit ukiut 49-t qaangiussimalerput, taamanikkulli qanoq iliorneqarnerluni eqqaamanngilaa. Eqqaamanngivippaa. Spiralilerneqarlunili nalunngilaa. Niviarsiararpaallutilli napparsimmaviliartitaareerlutik kollegiami sinittarfissuarminni unnukkut nipaarrattarlutik tamatuma kingornaniillu ukiorpaaluit tulliini anniarujussuartarluni eqqaamavaa.

Hedvig Frederiksenip spiralilerneqarsimasorpaat allat 66-it peqatigalugit tamarmik immikkut 300.000 koruuninik Naalagaaffimmit inuttut pisinnaatitaaffinnik unioqqutitsisimaneraallutik taarsiivigeqqupput. Taakku taarseeqqusissutaat katillutik 20,1 millionit koruuniupput.

Niviarsiaqqanut Paamiuni kollegiamiittut spiralilerneqarsimasutuaasut, Hedvig Frederiksen ukiorpassuarni isumaqarsimavoq.

Taamaammat danskit naalakkersuisuisa nunatta inuisa taamanikkut nunarsuarmi amerliartornerpaasunut ilaasut amerliartorunnaaqqullugit 1960-ikkunni 1970-ikkunnilu arnanik tuusintilikkuutaanik spiralilersuisitsimanerat DR-ip aallakaatitassiamini saqqummiummagu Hedvig Frederiksen annilaarpoq.

Ukiorpassuarni kanngusuttoq

Hedvig Frederiksen 14-inik ukioqarluni ilaqarnikuunaniluunniit spiralilerneqarpoq. Taamaammat spirali suunersoq taamanikkut aamma naluaa.

- Spiralilerneqarnerput oqallisiginngisaannarparput, aamma sooq spiralilerneqarnersugut inersimasunit nassuiaanneqarnikuunngilagut. Ukiorpassuarni kanngusuppunga, Hedvig Frederiksen oqarpoq.

Tassa Hedvig Frederiksenip ukiut 49-t matuma siorna spiralilerneqartinnani spiralilerneqareeramilu puiguikkiusimasani Nuummi angerlarsimaffimmini kakkissarfimmik tigummiaatigaluni tussunngulluni oqaluttuarai. Ingammik spiralilerneqarnerminiit ukiorpassuarni anniartarnini eqqaamavai.

Hedvig Frederiksenimi ullutsinni spiralininngarnit marloriaammik angisssusilimmik ernereersimasunuinnarnullu naatsorsuussamik spiralilerneqarsimasunut ilaavoq.

- Spiralilerneqarnerma kingorna aaqarujussuartalerpunga, taavalu ilukkut anniartarlunga assut aaqaraangama, taanna oqarpoq.

Spiralilerneqareerami allanngortoq

Hedvig Frederiksen spiralilerneqareerami atuarunnaarluni angajoqqaaminut qatanngutiminullu Arsummukarusukkaluarpoq. Angajoqqaavisali ilinniagaqaqqummanni atuarunnaarnani Paamiuniiginnarpoq.

Spiralilerneqareeramili allanngorluni eqqaamavaa. Spiralilerneqanngikkallaramimi eqqissisimasuullunilu piuminartuuvoq, spiralilerneqareeramili pinaasertunngorsimalluni.

Kollegiaqatimik ilaat igalaakkut unnuakkut qimaaqatigisalerpai, biilit assakaasuinik silaannaarisalerpoq nukappiaqqanillu tarfeqateqartalerluni.

- Imminut paariunnaarpunga. Killikka qaangiakulalerpakka, taanna oqarpoq.

Hedvig Frederiksen spiralilerneqareerami ilukkut anniartaraluaqaluni nakorsamit misissorneqarnikuunngilaq. Spiralilerneqarnerminiit ukiut arfineq-marluk qaangiutttut, tassa 21-nik ukioqarluni spiraleersippoq. Tamatuma kingorna pingasunik meerartaareernermi kingorna ilukkut anniassaanngilaq, ilaatigullu illissap silataatigut naartusimalluni.

1960-ikkunni 1970-ikkunnilu spiralilerneqarsimasut ilarpaalui kingorna ajuuteqarlutik aamma ilukkut anniartarlutik oqarput, spiralilerneqarsimasorpaallu Naalagaaffimmit taarsiivigeqqusut 67-iusut affangajaat meerartaarsinnaasimanngillat.

Hedvig Frederiksen anniassaarnikuuvoq. Spiralilerneqarnerminilli suli kingunerluuteqarpoq.

- Ikileqqasutut ukiorpassuarni misigisimavugut.

- Naalagaaffiup killigut qaangerpai. Naalagaaffiup inuttut pisinnaatitaaffiit atsiornikuusani unioqqutissimagai isumaqarpunga. Taamaammat taarsiiffigisariaqarpaatigut, Hedvig Frederiksen oqarpoq.