Somaliami tusagassiortup nunaqqatini aallaqqunagit kajumissarai

Sapaatit akunnerata kingulliup aallartinnerani umiatsiaq qimaasunik nunasinianillu ilaasulik Libyamit Italiamukartilluni kivivoq. Ilaasut qassit ajunaarnersut suli nalunartoq, Naalagaaffiit Peqatigiit qimaasunut qullersaqarfianneersoq, William Spinter oqarpoq.

- Ajunaarnersuarmi inuit immaqa 500-t ajunaarput, Spinter oqarpoq.

Umiatsiarpassuit qimaasunik ilaasullit kivereerput. Tamannalu tusagassiortup Somaliamiup Abdinur Mohamed Ahmedip qatsulluinnarpaa, iliuuseqarfiginiarlugulu aalajangerpoq. Tapersersortissarsiornermik Twitterikkut aallartitsivoq, nunaqatiminullu inunnik anngiortumik angallassisartunukannginnissaannik kaammartorlugit. Tusagassiortummi isumaani Somaliamiut aallarnatik nunaminnik sorsuffiusumut sanaqqeqataagunik pitsaanerussaaq.

Taassumalu hashtagi atugaa nutserlugu imaappoq: toqumik pisinak. Taamatullu sulissuteqarnera Somaliami nuannarineqartorujussuanngorpoq.

Abdinur Mohamed Ahmedilu BBC Trendingimut oqarpoq, qimaasut Europami inuunermut takorluugaat, piviusumit allaanerusartut. 

Tusagassiortup ilaqutai Sverigemiittut BBC-ip aamma oqaloqatigai. Inuuniarnerlu ilimagisamit unammillernarnerusoq, ilaqutaasunit oqaatigineqarpoq. Oqaatsitigut aporfeqartarneq, akissarsiakitsuuneq, pappiaraatinik amigaateqarneq inuiaqatigiinnut ilanngutitaavinnermut ilaatigut aporfiusartut, ilaqutaasup oqaatigaa.

- Soorlumi silami paarnaarussaaqqalluni, Abdinur Mohamed Ahmedip ilaqutaata oqaatigaa.