Politikki

VIDEO Hardenbergip soraarnini millioninik pissarsiaqaatigissavaa

Svend Hardenberg ingerlaannaq suliffissarsiortariaqassagunanngilaq. Naalakkersuisut siulittaasuata naalakkersuisoqarfiani pisortaanertut atorfimminit soraartup akissaatit pillugit isumaqatigiissutini atorlugu 2 millionit koruuninnannissani qulakkeerpaa.

Allattoq Sivert Olsen

marsip 17-at 2015 12:47

- Qaammatini 18-ini akissarsiaqassaaq, Kim Kielsen KNR-imut taama oqarpoq.

Aningaasat pineqartut atorfeqarnermi sinnerani - tassalu 2016-imi septembarip tungaanut - akissarsiassaraluatut amerlatigipput.

Aamma atuaruk Hardenberg pisortatigoortumik tunuarpoq

Svend Hardenbergilli maanaannaq suliunnarsinneqarneranut suna pissutaanersoq Naalakkersuisut siulittaasuata oqaaseqarfigerusunngilaa.

- Tallimanngormat atorfimminit soraarpoq (marsip 13-iani, aaqq.). Pisortat ataatsimeeqatigiipput malittarisassallu malinneqarnissaat isumaqatigiissutigalugu, akissarsiaqartinneqassaaq atorfininnermilu isumaqatigiissutaani malitassat allat naammassineqassallutik, Kim Kielsen oqarpoq.

Aamma atuaruk Hardenberg pillugu

Svend Hardenbergip 'atorfimminit tunuartitaagallarnera' Naalakkersuisut siulittaasuata naalakkersuisoqarfianit februaarip 24-ani nalunaarutigineqarpoq, Søren Hald Møllerilu pisortaanerugallartussatut toqqarneqarluni. Tunuartitaaneranulli suna pissutaanersoq oqaatigiumaneqanngilaq.

Nutaarsiassami kukkunermik nassaarsimaguit uunga allaffigineqarsinnaavugut.