Hans Lyngep eqqumiitsuliai nunatsinnukaanneqartussanngortut
Hans Lyngep eqqumiitsuliaasa nunatsinnukaanneqarnissaat qanilliallappoq.
Nunatta Eqqumiitsulianik Saqqummersitsivissaani siulittaasoq Josef Motzfeldt taama nalunaaruteqarpoq.
Eqqumiitsuliat Danmarkimiittut Nunatta Eqqumiitsulianik Saqqummersitsivissaanut pigisassatut tallimanngormat tunniunneqarput. Tamanna pivoq Nunatta Danmarkimi Sinniisoqarfiani naapinnermi Inge Hans Lyngellu Aningaasaateqarfiata pigisaasa Josef Motzfeldtimut tunniunneqarneranni.
Tassunga peqatigitillugu eqqumiitsuliat Inge Lyngep nammineq pigisani peerukkuni Nunatta Eqqumiitsulianik Saqqummersitsivissaanut tunniunneqarumaartut uppernarsarpaa.
Nunatta Eqqumiitsulianik Saqqumersitsivia suli naammassinngitsoq
Eqqumiitsuliat tunissutit tassaapput qalipagarpassuit, qiperukkat titakkallu untritilikkaat. Hans Lyngep suliai eqqumiitsulianut immikkut isumannaallisakkatut toqqorsiviugallartumut inissinneqarput, imarpillu ikaarlugu angerlaanneqannginnerminni Danmarkimi saqqummersinneqartarallassallutik.
Eqqumiitsuliat qaquguugaluarnersoq nunatsinnut pigunik Nunatta Eqqumiitsulianik Saqqumersitsivissaata pigilerumaagaani erlinnartuutitut pingaarnertut inissisimalerumaarput.
Saqqummersitsivissarli suli naammassinngilaq. Taassumali piviusunngornissaa qanilliallattoq siulersuisuni siulittaasoq Josef Motzfeldt isumaqarpoq. Danmarkimi inuussutissarsiummik ingerlaqartoq namminersortoq kinaassutsiminillu isertuussisoq Nunatta Eqqumiitsulianik Saqqummersitsiviata illutassaata sananissaanut 50 millionit koruuninik feberuaarimi aningaasaliivoq.
Eqqumiitsuliortoq nunatsinni pingaarutilik
Nunatta Eqqumiitsulianik Saqqummersitsiviata sananeqarnissaanut Inatsisartut 50 millionit koruuninik immikkoortitsillutik 2023-imut aningaasanut inatsit akueraat. Saqqummersitsivissap sananeqarnissaanut 260 millionit koruunit aningaasartuutigineqassasut naatsorsuutigineqarpoq.
Danskip inuussutissarsiummik ingerlaqartup namminersortup kinaassutsiminillu isertuussisup aningaasaliineratigut Nunatta Eqqumiitsuliani Saqqummersitsiviata piviusunngornissaa qanilliallappoq. Josef Motzfeldt naapertorlugu suli aningaasaliisussaqarsinnaassaq sananissallu aappaagu aallartissinnaanissaa siulersuisut neriutigaat.
Eqqumiitsuliortoq Hans Lynge Sønderjyllandimi Haderslevimi 1988-mi toquvoq. Taanna Nuummi 1906-imi inuuvoq nunattalu eqqumiitsuliornikkut oqaluttuassartaani pingaarnerpaat ilaattut isigineqarluni.
Taanna aamma atuakkiortuusimavoq, politikeriusimalluni nunarpullu ineriartussasoq namminiilivissasorlu kissaatigisimallugu.
