Qeqertarsuatsiaaneersoq Hans Christiansborgimi ukiunik 40-nngortorsiortoq

Qeqertarsuatsiaaneersoq, Hans Bendixen, Christiansborgermiunit tamanit ilisimaneqarpoq. Taassuma politikerit danskit kalaallillu ukiuni kingullerni 40-ni qanillivissimasai amerlapput.
Hans Bendixen nakkutilliisutut Christiansborgimi 1983-imi atorfinippoq. Christiansborgimi ullumi pingasunngornermi ukiunik 40-nngortorsiorpoq. Assi © : Privat
februaarip 01-at 2023 11:58
Nutserisoq Hanne Petersen

Hans Bendixen nunatsinni arlaqanngitsunik ilisarisimannitseqarpoq.

Hans Christiansborgimili politikerit sulisullu akornanni ilisarisimaneqarluarpoq. Taanna 65-inik ukioqarpoq, Poulsenimik siornatigut kinguliaqarpoq Qeqertarsuatsiaanilu peroriartorluni.

Illussaarsuarmi Christiansborgimi ukiuni kingullerni 40-ni ilaatigut nakkutilliisutut, politikerit allaffiini pisatsersuisutut aserfallatsaaliuisutullu sulinermini torsuusani arpasukaartaqaaq.

Taannalu kalaallinit kingoqqisuusoq taakkuninnga ilisarinnissinnaasunut ersarippoq. 

Nuummi 1958-imi inuuvoq, arnaa kalaaliuvoq angutaalu savalimmiormiuulluni. Angajoqqaavi Nuup kajataani nunaqarfiusimasumi Kangerluarsorusermi naapissimapput.

Hans Bendixen aanamini Qeqertarsuatsiaani peroriartorpoq, aananili qulinik ukioqarluni toqummat arni angutissanilu ornillugit Danmarkimut nuuppoq.

1979-imi sanasunngoreerluni politikerit akornanni sulilernissi takorloorsimanngilaa. Taamanili suliffissaaleqinersuaqarpoq, Christiansborgimilu 1983-imi nakkutilliisussarsiortut arajutsisimanagu qinnuteqarpoq:

- Folketingimi tamatuma kingorna oqaloqatiserimmannga paasivara atorfik taanna pilerigineqarluartoq, qinnuteqartuusugummi 600-t missaanniissimagatta. Uangali toqqarmannga tamaani 1983-imi februaarip aallaqqaataani atorfinippunga, taanna KNR-imut oqarpoq.

Politikerinik nuimasunik qanillivissimasaqartoq

Ukiualunni nakkutilliisooreerluni allakkanik Folketingimi ilaasortanut anngussassanik immikkoortiterisunngorpoq. Tamatuma kingorna allagaataasivimmi suleriarluni aserfallatsaaliuinermut immikkoortoqarfimmi ingerlatsinermi 1990-imi ikiortinngorpoq.

Christiansborgimi ukiunik 100-ngajannik pisoqaassusilimmi aserfallatsaaliuneq politikerillu allaffiini pisatsersuineq ingerlatsinermi ikiortitut ulluinnarni suliaanut ilaapput. Ingammillu politikerit allaffiini pisatsersuisarnermini politikererpassuarnik danskinik kalaallinillu qanillivissimasaqarpoq.

Hans Bendixen pillugu paasissutissat
 
Assi © : Privat


Nuummi 1958-imi inuuvoq Qeqertarsuatsiaanilu peroriartorluni

Arnaa kalaaliuvoq angutaalu savalimmiormiuulluni. Arnimisulli Poulsenimik siornatigut kinguliaqarpoq.

Arnaata Nuup kujataani nunaqarfiusimasumi Kangerluarsorusermi ukiorpanni suliartortarfigisimasaani feeriartarsimavoq.

Sanasutut ilinniarsimasuuvoq Folketingimilu ukiunik 40-nngortorsiorpoq

Nulianilu marlunnik qitornaqarput pingasunillu ernutaqarlutik

Ministeriunerusimasoq nunaqqatiminillu toorlannerarneqartartoq, Poul Nyrup Rasmussen (S), qanillivissimasaanut ilaavoq. 

- Poul Nyrup ikinngutigilerluakkannut ilaavoq. Taanna uumisaarnianngilara, kisianni tusagassiuutinut sassartilluni peqqusiileqisaqaaq, qanillivikkaannili ikasarlunilu inuppalaartaqigami allaanerusaqaaq. 

Nunanut allanut tunngasuni ministeriusimasoq Venstrellu siulittaasorisimasaa, Uffe Ellemann-Jensen, Hans Bendixenip ilisarisimallualigaanut aamma ilaavoq.

Ellemann-Jensenilu nerrivimmik allaffimmik angerlarsimaffianut biilerlutik assartueqatigiinnertik, Hans Bendixenip puiguikkiulluinnarsimasaanut ilaavoq. 

Biileqatigiinnerminni kikkunnit kingoqqisuunertik oqaluttuaraat.

- Kalaallinit savalimmiormiunillu kingoqqisuullunga oqaluttuuppara. Taava saappaanga, isigilaariarlungalu tissitsalluni pilerpaanga: 'Taamaappat assigiinngeqisut kinguaarisimassavaatsit, nuannivippoq, Bendixen oqarpoq Uffe Ellemann-Jensenillu illariarnera issuarlugu.

Nunarput pillugu eqqartueqatigiileriaramik Uffe Ellemann-Jensenip pequtini immikkuullarissoq takutinniarlugu angerlarsimaffianukaqataaqquaani.

- Allaffimmini issiavini sumik qalligaanersoq eqqoriaaqquaanga. Eqqoriarsinnaangilarali. Qeeqqap amianik qitulisakkamik qallertissimanerarpaa. Issiavik kusanarpianngilaq, oqaluttuassartaali nuannerpoq, nunatsinnimi qeerartap amianik qalligaammat inuttaalumi nunatsinniikulasarluni, Hans Bendixen oqarpoq.

Ilaatigullu partiit talerperliunianeersut allat peqatigalugit Øresundimi tamatuma kingorna aalisariaqatigiittarsimapput. 

Lars-Emil Johansen: Bendixen Christiansborgimi pinngitsoorneqarsinnaanngilaq

Nunatsinnit Folketingimi 1983-ip kingornali ilaasortaasimasut ilaasortaajunnaarsimasullu arlaqaalupput. Taakkulu tamarmik Hans Bendixen ilisarisimavaat – taakkunanngali ataasiakkaaginnaat Hans Bendixenimut sunniuteqangaatsiarsimapput.

Ingammik Hans-Pavia Rosing (S) aamma Preben Lange (S) sunniuteqangaatsiarsimasut, Hans Bendixen oqarpoq imali nangilluni: 

- Lars-Emil uannut sunniuteqarnerpaanikuuvoq, aammami inuppalaaqalunilu nunarput sullinnikooqimmagu. Taanna ikinngutigilerluakkanut aamma ilaavoq.

 

Assi © : Privat
Hans Bendixen Christiansborgimi aserfallatsaaliueqataasarpoq. Folketingimi assilisittoq assimi takuneqarsinnaavoq.

 

Ingammik inuunermi misigisaminnik nuannersunik nuanniitsunillu eqqartueqatigiittarsimaqaat.

- Lars-Emililu oqaloqatigiittarnikooqaagut, soorlu inuunitsinni tamatta immikkut sakkortuunik ataatsikkut nalaataqaleruttornitsinni. Lars-Emil uummatini taamani mianerisariaqarpaa, nuliaralu taamani toqqutigingajataminik timimigut bakterianittoorsimalluni. Tamakku kunngikkormiut atuagaateqarfianni, Det Kongelige Bibliotekimi, akunnerpanni oqaloqatigiissutigaavut, Hans Bendixen oqarpoq.

AAMMA ATUARUK 14-inik ukiullit Folketingimi ataatsimeeqataasussat: Nunatsinni inissiat oquttut amerlaqaat

Lars-Emil Johansenillu oqarnera naapertorlugu Hans Bendixen Christiansborgimi ingammillu Folketingimi ilaasortani nunatsinneersuni pinngitsoorneqarsinnaanngilaq.

- Inuit katersuuteqqajaasartuugatta kalaaleqateqarluta paasigaangatsigu attavigikkajuttaratsigit soorunami atassuteqarfigaarput. 

Bendixenilli kalaallinit kingoqqisuunera atassuteqarfigineranut kisimi peqqutaanngilaq. Lars-Emil Johansenimmi oqarnera naapertorlugu Bendixen Christiansborgimi pinngitsoorneqarsinnaanngilaq:

Hans Bendixen Christiansborgimik ilisimaarinnilluartutut ilisarisimaneqarnerpaanut ilaavoq. Inutsialassuuvoq, pikkorissorsuuvoq ilisimasaqarluarlunilu, Lars-Emil Johansen oqarpoq.

Kim Kielsenilu 'high four'-tartut

Naalakkersuisuni siulittaasuusimasorlu, Kim Kielsenilu aamma attavigiittarsimapput. Kalaalioqatigiinnertilli pinnagu inussaminnik tamarmik ilanngartoornikuunertik peqqutigalugu attavigiittarsimapput:

- Kim Kielsen Naalakkersuisuni siulittaasunngoqqammertoq naapilluta assammikkatta tupaallaatigalunga eqqarsaammerpunga: 'Sunaaffaana inussaminik aamma ilanngartoornikuusoq! Tissitsappugut, tamatuma kingornalu naapikkaangatta high fivernata tamatigorluinnaq "high four"-tarpugut.

Hans Bendixenip politikerit nunatsinneersut Christiansborgimi ukiut kingulliit 40-t ingerlaneranni sulisimasut tamaasa ilisarisimasarigaluarlugit suli amigaateqarpoq.

Taannami nunarput meeraalluni qimakkamiulli nunatsinneeqqinnikuunngilaq.

- Nunatsinnukaqqikkusuttorujussuuvunga. Suararpassuit pissutigalugit 1967-ip kingornali nunatsinneeqqinnikuunngilanga. Ilaquttakkalu ukiut tulliuttut ingerlaneranni tikikkusoqaarput.

Hans Bendixen Foketingimi ukiunik 40-nngortorsiornera Christiansborgimi ullumi pingasunngornermi februaarip aallaqqaataani ilassinnertalimmik malunnartinneqarpoq.