Hans Enoksen politiinut tunniunneqarpoq

Naalakkersuisut siulittaasuat inatsisinik unioqqutitsisimanersoq Nuummi politimestereqarfiup isummerfigisussanngorpaa. Tassami Hans Enoksen politiinut tunniunneqarsimavoq – tassa Qaqortumi innuttaasut ilaannit.

Angut naalakkersuisut siulittaasuannik politiinut tunniussisoq tassaavoq Bendt Sand, naatsorsuuserisoq namminersortoq, ukiut 26-t nunatsinniissimasoq. Taassuma politiit qinnuigai misissoqqullugu Hans Enoksen aalisarnermut inatsimmik unioqqutitsisimanersoq, tassa ilisarisimasami aalisakkanik pisassanik qinnuteqaataat immikkut akuerisimaneraat paaserusullugu.

KNR-imi aallakaatitaq tunngavigalugu Bendt Sand-ip naalakkersuisut siulittaasuat politiinut suliassanngortippaa.

Peter Damborgip Itisiliinermi apeqqutaasa akineqannginnerisa puffaammisippaanga. Eqqarsarpungalu allat iliuuseqarumanngippata taava uanga politimesteri qinnuigisariaqarlugu unnerluussinissamut periarfissaqarnersoq.

- Politimestereqarfiup qanoq iliuuseqarnissaa naatsorsuutigaajuk?

- Naatsorsuutigaara politimestereqarfiup pineqartoq misissoqqissaassagaa unnerluussinissamullu periarfissaqarnersoq periarfissaqannginnersorluunniit misissorlugu. Inatsisitigullu tunngavilersukkamik akineqarumaarlunga, tassami politimestereqarfik pikkorissunik inatsisileritooqarmat. Politimestereqarfiup suliassaq itigartissagaluarpagu Danmarkimi justitsministeriamut suliassaq misissugassanngortilersaarpara, Bendt Sand oqarpoq.

Bendt Sandip erseqqissarpaa nammineq kisimiilluni suliassanngortitsisuugami – naatsorsuutigalugulu suliassanngortitsinini eqqartuussisutigut iternga tikillugu suliarineqassasoq.