Hammondip inuussutissarsiornikkut Japanimi pilerisaarinissaa taamaatiinnarneqarpoq
Niuernikkut pilerisaariniarluni Japanimut angalanissaq taamaatiinnarneqarpoq, tamannalu Inatsisartunut qinersisoqartussanngorneranik peqquteqarpoq.
Allattoq Apollo Jeremiassen
oktobarip 08-at 2014 12:33
Nunatta Japanimut suleqateqarnerata annertusarneqarnissaa pillugu, Naalakkersuisut siulittaasorisimasaata, Aleqa Hammondip decembarip aallartinnerani angalanissaralua taamaatiinnarneqarpoq. Aleqa Hammondip angalaqatigisussaagaluarpai Kunngissakkut, Nunatsinni suliffeqarfiit, takornariartitsinermik suliaqartut taamatullu Nunatsinni kulturikkut suliaqartut.
Namminersorlutik Oqartussat Nunanut Allanut tunngasunut Pisortaqarfiani protokolchefip, Jakob Rohmann Hardip tamanna nalunaarutigaa.
Aamma atuaruk Aleqa Hammond decembarimi Japanimut tikeraassaaq
- Japanimut tikeraarnissamik isumaqatigiissutit taamaatiinnarneqarnerat, ileqqorissaarnerup aqqa aqqutigalugu tallimanngormat nalunaarutigaarput. Tassami suliffeqarfiit isumaqatigiissutigineqaraluartut arlaqarput aamma angalasussat inissaat inniminnerneqareeraluarlutik, Jakob Rohmann Hard KNR-imut oqarpoq.
Inatsisartunut qinersereernerup kingorna Japanimut angalanissaq piviusunngussappat, tamanna Naalakkersuisunngorumaartussat aalajangissarigaat, Jakob Rohmann Hardip oqaatigaa.
- Taamaattoqassappallu aamma Kunngisakkut peqataatinneqassappata, tamanna siusissukkut taakkununnga isumaqatigiinniutaasussaassaaq, Nunanut Allanut tunngasunut Pisortaqarfimmi protokolchefi, Jakob Rohmann Hard taama oqarpoq.
Kinami Nunatta sinniisoqarfeqalernissaa Naalakkersuisut siulittaasorisimasaata, Aleqa Hammondip aamma pilersaarutigigaluarpaa, taannalu aappaagu upernaakkut pilersaarutaagaluarluni.
