Aleqa Hammond decembarimi Japanimut tikeraassaaq
- Tikeraarnermi suut sammineqarnissaannut pilersaarusiornissatsinnut ullumi ataatsimiinneq periarfissiilluarpoq, Aleqa Hammond oqarpoq.
- Decembarimi tikeraarnera kalaallit Japanimi inuussutissarsiornikkut nittarsaassinerannut atorneqassaaq, tassa imaanit pisuussutinik, takornariaqarnermik, puisit amiinik tuniniaanermik aatsitassarsiornemillu inuussutissarsiortut peqataassallutik, Aleqa Hammond tusagassiuutinut nalunaarummi allappoq, nangillunilu:
- Japanip Issittumi Siunnersuisoqatigiinni ataavartumik alaatsinaattutut inissisimalernera pillugu tikilluaqquara, aamma Issittumi Siunnersuisoqatigiinni nunat alaatsinaattutut ilannguttut Issittumi inissisimanertik qanoq igissaneraat qilanaarinerarlugu.
IWC-imi Kalaallit Japanimiullu misilittagaqarfigilersimasaanni akunnitsinnilu miluumasut imarmiut pillugit attanneqarsinnaasumik siunissami ingerlatsinissaq aamma oqaloqatigissutigaavut.
Aleqa Hammondip Japan Kalaallit Nunaata ukiorpassuarni ikinngutaatut taavaa aamma aalisarnermik uuliasiornermillu ineriartortitsinitsinni peqataasimanerat aamma oqaatigalugu.
- Japanip Issittumik sammisaqaqqilerneratigut, attaveqaqatigiinnerput piffissamut soqutiginartumut alloriaraluttualerpoq. Taamaattumik ullumi ataatsimeeqatigiinnerput Kalaallit Nunaata Japanimut attaveqarnerata ineriartorteqqinnissaanut aallaavissaqqissuuvoq, Naalakkersuisut Siulittaasuat Aleqa Hamond taama naggasiivoq.