Hamasimeersut: Israelimiut Gazamik unnuaq saassussimmata inuit 140-nit ikinnerunngitsut toqutaapput
Israelimiut Gazamik silaannakkut unnuaq saassussimmata inuit ikinnerpaamik 140-t toqutaasut, Gazami naalakkersuisut Hamasimeersut marlunngornermi ullaakkut nalunaarutigaat.
Hamas Israelimik saassussimmalli inuit 5000-nit ikinerunngitsut Gazami maannamut toqutaasimasut islamisiortut nalunaarutigaat.
Israelip illersornissaqarfiata nalunaarutaa naapertorlugu Gazami sakkutuut inissisimaffii 400-t unnuap ingerlanerani eqqorneqarput.
Sulluliaq eqqorneqartunut ilaasoq Israelip oqaatigaa. Hamasip sorsuttartui sulluliaq pineqartoq aqqutigalugu Israelimut immamit isaasinnaasimasut Israelip nalunaarutigaa. Qinusarfiit ilaat moskeq Hamasip sorsuttartuinit katersuuffigineqartartoq aamma eqqorneqarpoq.
Nutaarsiassaqartitsiviulli Reutersip paasissutissat tamakku uppernarsarsinnaasimanngilai.
Hamasip sallunaveeqqutitut tigummiai sisamat ulluni kingullerni iperagaasimapput.
Arnat juutit marluk, 79-inik 85-inillu ukillit, taakkununnga ilaapput.
Hamasip oqarnera naapertorlugu arnat marluk taakku peqqiilliornerat iperagaanerannut pissutaavoq.
Hamas sallunaveeqqutinik tigummiaqartilllugu sakkuaakkunnaarallartoqarnavianngitsoq Israelip naalakkersuisuisa oqaatiginikuuaat.
