Biden naalagaaffiit allat siuttuinik Gazami sorsunneq pillugu attaveqateqartoq

USA-p præsidentia, Joe Biden, USA-p nunani killerni iligisamik pingaarnersaannik Gazami sorsunneq pillugu oqarasuaatikkut ataatsimeeqateqartoq, USA-p præsidentiata illorsuanit oqarput.

Biden Canadap ministeriuneranik, Justin Trudeauimik, Frankrigip præsidentianik, Emmanuel Macronimik, Tuluit Nunaata ministeriuneranik Rishi Sunakimik, Tysklandip forbundskanslerianik Olaf Scholzimik Italiallu ministeriuneranik Giorgia Melonimik oqaloqateqarpoq.

Oqaloqatigiinnerninngaanniit paasissutissat kingusinnerusukkut saqqummiunneqarumaartut, AFP allappoq.

Bidenip Israelip ministeriunera, Benjamin Netanyahu, sapaatiummat aamma oqaloqatigaa.

USA-p præsidentiata Bidenip paavi Fransi akerleriinneq pillugu aamma oqaloqatigereerpaa.

Gazami akerleriinnerup sakkortusinissaata pinaveersaartinneqarnissaa Kangia Qiterlermilu eqqisseqatigiinnissap sulissutigineqarnissaa pillugit tassani isumaqatigiittut, USA-miut oqarput.

Præsidentip Macronip Israelimut ullualunnguit qaangiuppata tikeraarnissaa naatsorsuutigineqarpoq. Aamma Hollandip ministeriunera, Mark Rutte, tikeraassasoq, Netanyahup allattoqarfiata nalunaarutigaa.

Rutte Israelimut ataasinngornermi tikeraassasoq, Hollandip naalakkersuisui oqarput.

Tassani Netanyahu palæstinamilu namminersorlutik oqartussani siuttoq, Mahmoud Abbas, naapeqatigissavai.