Lastbiilit ikiuutissanik assartuisut siulliit Gazamut pisut
Lastbiilit ikiuutissanik assartuisut siulliit arfininngornermi Gazamut pipput. Nunani tamalaani tusagassiuutit assigiinngitsut taama tusarliussipput.
Egyptinimiut TV-at lastbiilit killeqarfiup illuatungaanut ingerlaarnerannik arfininngornermi toqqaannartumik takusassiillutik immiussipput.
Gazami Israelimiut nakkutilliiviginngisatuaanni lastbiilit hunnorujulikkaat killeqarfiup illuatungaanukartut nalunaarutigineqarpoq. Lastbiililli tamarmik isaanngillat.
Palæstinamiut sakkulersorsimasut Hamasit naapertorlugit lastbiilit 20-t nerisassanik amerlasoorsuunngitsunik nakorsaatinillu nassassasut arfininngornermi pilersaarutigineqartoq oqaatigineqarpoq.
Lastbiilit ingerlaqatigiiaat isaariitsiarnerisa kinguninngua killeqarfik matuneqarsimasoq tusagassiorfiit arlallit nalunaaruteqarput.
Hamasip Israelimik saassusseqqaarnera uani akunnerup naanerani sapaatit akunnerit marlunngussavaat.
Israeilimiut Gazap pallitsaaliuinneqarnissaanik atuutsitsipput.
Nerisassat, nakorsaatit orsussallu eqqunneqarsinnaanngillat, tamannalu innuttaasunut ajunaarutaaratarsinnaaneranik kinguneqarsinnaasoq suliniaqatigiiffiit naalakkuersuisunut attuumassuteqanngitsut mianersoqqusipput.
Ikiueqqaartussat utaqqineqartut Gazami peqqiilliornernik allanngortitsinavianngitsut Hamasip tusagasssiisarfia Reuters naapertorlugu oqarpoq.
