Gunvor Bjerre kalaallit unikkaavinik peroriartuutilik: Atuakkiaa Amerikami nersorneqartoq

Atuagaq Qaammatip inuanik taaguuteqarpoq, taanna kalaallit oqaluttuatoqaataannik unikkaanillu assigiinngitsunik imaqarpoq. Atuagaq Milik publishing suleqatigalugu 2016-imi saqqummersinneqarpoq.

Atuakkap tuluttut inuktitullu nutserneqarnissaannut pisinnaatitaaffik Canadami Inuit atuakkanik naqiterisarfiata Milik publishingimit pisiaraa, atuagarlu tuluttut siorna saqqummersinneqarpoq.

Atuagaq taanna meeqqanut inuusuttunullu unikkaanik immikkut maluginiagassatut Amerikami peqatigiiffimmit, American Folklore Societymit ukioq manna nersornaaserneqarpoq.

Tusagassiortup atuakkiortullu Gunvor Bjerrep oqaluttukkat piioreersut atuaganngorlugit saqqummerseqqippai, atuakkiamilu kalaaleq eqqumiitsuliortoq, Miki Jacobsen titartaasuuvoq.

Nersornaaserneqarnerlu Gunvor Bjerremut tunissutaavoq annertooq.

- Ataqqinaataavoq annertooq. Ataqqinaammik nersorneqarnera qujamasuutigeqaara. Atuakkap Kalaallit Nunaanniinnaanngitsoq Danmakimiinnaanngitsorlugu kisianni aamma USA-mi Canadamilu ilisimaneqalernera nuannaarutigaara, taanna oqarpoq.

Oqaluttuatoqqat unikkaallu meeraallunili tusartarpai

Gunvor Bjerre kalaallit oqaluttuatoqaataat unikkaavillu meeraanerminiilli tusartarpai, taakkulu nammineq ingerlateqqikkusuppai.

- Isumassarsiaq suminngaannit pinngornersoq nassuiaruminaappoq, kisianni Kalaallit Nunaanni angalasarnikooqaanga kammalaateqarlungalu. Knud Rasmussenip unikkaavi oqaluttuatoqaataallu mikisuullungali tusartapakka. Taava eqqarsarpunga, danskit meerartaasa tamakku ilisimasaqarfiginerulerusullugit soqutiginartissinnaaagaat.

- Uanga nammineerlunga 20-nik ernutaqarpunga, tusarnaartunik ulikkaarpunga. Atuakkiap suliarinerani ernuttakka atuffattarpakka, assorsuaq alutorsartaqaat, Gunvor Bjerre oqarpoq.

AAMMA ATUARUK Malik Høeghip atuakkiaani oqaluttuatoqqat uummartinneqartut

Nersorneqarnerit siunissami qanoq iluaqutigisinnaaviuk?

- Atuagaq nittarsaannialeraangakku oqarsinnaalissaanga taanna atuagaq ataqqinaammik nersorneqarnikuusoq. Taava atuakkap atuarnissaanut soqutiginnittut amerlanerulissapput, taanna oqarpoq.

Atuagaq Mariane Petersenimit kalaallisuunngortinneqarpoq.