Malik Høeghip atuakkiaani oqaluttuatoqqat uummartinneqartut
Toqutsineq sapiisernerlu. Ikinngutigiinneq, piniarneq, upperisaq ileqqorissaarnerlu.
Piniartorsuaq Akamalik pillugu oqaluttuatoqqat tamakkuninnga imaqarput. Akamalik sinnattortitaalluni kristumiussutsimut saatsitaavoq, atuakkanik naqiterisitsisarfik Milik taama allappoq.
Naqiterisitsisarfiullu atuagaq 'Akamalik' ullumi pingasunngornermi saqqummersippaa.
Akamalik, aamma Uujuut, Uujoorsuaq Usulissuarlu atuakkami oqaluttuarineqarput. Taakkuninnga oqaluttuat naqiterisumit Frederik Høeghimit 1930-kkunni katersorneqarput assaannarmillu allagaallutik. Saqqummersinneqarsimanngisaannarpulli.
Manuskriptiliaali assaannarmik allagaasut ukiorpassuit qaangiunnerini KNR-ip toqqorsiviani nassaarineqarput. Malik Høeghillu, Faré Høeghip ernutaata, oqaluttuat aaqqissuullugillu allattaasitaamut nussorsimavai.
Oqaluttuatoqqanut Kujataaneersunut tungatillugu amigaatigineqartut pissarsiarinissaannut suliaavoq nallernissaqanngitsoq, Milik Publishing taama allappoq.
Atuakkanik naqiterisitsisarfiup neriuutigaa atuagaq aliikkutassiatut kalaallillu oqaluttuariaasiinik kulturiannillu ilisimatusarnermut atorneqarsinnaassasoq.
Atuakkap 'Akamalik'-up saqqummersinneqarnera kulturikkut illorsuarmi Katuami ullumi pingasunngornermi nalunaaqutaq ataatsimut malunnartinniarneqassaaq. Aaqqissuussineq tamanut ammavoq.
