Grønlandsbankenip angusai marloriaatit sinnerai
Grønlandsbankenip ukiup affaani siullermi angusai piareerput aningaaseriviullu pisortaanut atuagassaq nuannersuulluni:
- Soorunami aningaaserivimmut nuannersuuvoq, ukiup affaa siulleq kisitsisinik taama kusanartigisunik angusaqarluta anigoratsigu. Tamatuma aamma uninngasuutit taarsigassarsiarititallu aatsaat taama amerlatigimmata unammillersinnaassutsikkut inissisimalluarnerput takutippaa, Martin Kviesgaard tusagassiorfinnut nalunaarummi oqarpoq.
Grønlandsbankenimi ukiup affaani siullermi angusat akileraarutit ilanngaatigereerneragit 103 millioner koruuniupput. Imaappoq, angingaaseriviup siorna taamaalineranut sanilliullugu angusani marloriaatit sinnersimagai, siorna angusat 45,8 millioner koruniusimallutik.
Angusat taamak amerlatiginerannut aningaaserivik naapertorlugu pissutaavoq taarsigassarsiarititat amerliartorujussuarsimanerat, aningaasat nalinginut iluarsiissutit pitsaasumik inissisimanerat kiisalu aningaaseriviup Nationalbankenimut aningaasaliissutaanut erniat qaffasinnerusimanerat.
- Qaqutigoorpoq suut tamarmik maannakkutut eqqortumik ingerlasarnerat, Martin Kviesgaard oqarpoq.
- Inuussutissarsiornermi sullitattalu inuinnaat pitsaasumik ineriartorfiunerat pingaartumik illoqarfinni annerusuni takusinnaavarput. Tamanna 2022-mi kiisalu 2023-p affaani siullermi aningaaseriviup taarsigassarsiarititaasa aatsaat taama amerlatiginerannik isumaqarpoq, soorunamilu aningaaserivimmut tamarmut sunniuteqarpoq, aningaaserivimmi pisortaq oqarpoq.
Sulisut amerlinissaannut IT-mullu aningaaseriviup aningaasaliinera assilissami aamma ilaassapput.
Sulisoqarnermut aningaasartuutit 2023-mi amerlinissaat aningaaserivimmit taamaammat naatsorsuutigineqarpoq.
