Greenland Venture Aappaluttumut piginneqataassuteqarnerulertoq
- Siornatigut piginneqataassutitsinnut naleqqiullugu piginneqataassuteqarnerulissaagut, Karsten Høy Aappaluttumi rubisiorfimmut qanoq siunissami piginneqataassuteqartiginissartik pillugu oqarpoq.
LNS Greenlandip True North Gemsip akiliisinnaajunnaarneranit pigisanut tigusinissaanut Naalakkersuisut akuersissappata, Greenland Venture suliniummut taamaalilluni piginneqataassuteqarnerulissaaq.
Greenland Venturep Aappaluttumi suliniutip piginneqataassutaanik 7 procentinik 27 millionit koruunilerlugit amerlanerulersippai, taamaasillunilu piginneqataassutit katillugit 7,5 procentinik pigisaqalerluni.
Aamma atuaruk Aappaluttumi piiaavik Naalakkersuisut aalajangiiffigissavaat
- Nammineq aningaasaatinut aningaasaliivugut, akiliisinnaajunnaartoqartillugulu aningaasaliissutit taakku annaaneqartarput, Karsten Høy oqarpoq.
Namminersorlutik Oqartussat inuussutissarsiutinik ineriartortitsinermut ingerlatseqatigiiffiata aningaasaliissutaat nioqqutissiornermi atortunut atorneqartut, ingerlatseqatigiiffillu suliniummut suli piginneqataassuteqartoq, Karsten Høyip oqaatigaa.
- Aningaasat taakku pinngitsoorani aningaasaliissutaasussaapput. Nalillit taakku suli tassaniipput, taakkununngalu suli piginneqataavugut, Karsten Høy oqarpoq.
Aamma atuaruk LNS rubisiornissaminut piareersimavoq
Aaqqiissuussineq nutaaq malillugu Greenland Venturep suliniutip piginneqataassutaanik 9 procentinik pigisaqalissaaq.
Rubinisiortoqalissappallu aningaasaliisunik suli atorfissaqartitsisoqarmat Greenland Venture suliniummut suli aningaasaliiniarpoq.
Karsten Høyimi naapertorlugu Greenland Venture aningaasaleeqataassutinik 13 millionit koruuninik taarsigassarsititsinissaminut piareersimavoq.
Taarsigassarsiassat piginneqataassutinngortinneqarsinnaapput, taarsigassarsiallu taakku ilanngullugit Greenland Venture suliniummut katillugit 40 millionit koruuninik aningaasaliisimalissaaq.
Aamma atuaruk Qeqertarsuatsiaat eqqaani rubinisiorfik LNS Greenlandip ingerlatilertussanngorpaa
LNS Greenlandillu aningaasaaqarnikkut ajornartorsiuteqalernissaa ajornavippallu akiliisinnaajunnaarnissaa Karsten Høyip annilaangassutiginngilaa.
- Suliamut siulersuisut kikkuunersut misissornissaat pingaaruteqarpoq. Suliarlu una norgemiut ingerlatseqatigiiffiannit LNS-imit Norgemiittumit ingerlanneqarpoq, taannalu ajortuussangatinnanngilaq isumannaallisagaalluarlunilu, Karsten Høy oqarpoq.
LNS Greenland rubinisiorfimmut ingerlatsilersinnaassanersoq Naalakkersuisut sapaatit akunnerata ingerlanerani aalajangiinissaat, aatsitassanut naalakkeruisoqarfimmi pisortap, Jørgen Hammeken-Holmip naatsorsuutigaa.
Aamma atuaruk TNGG 100 millionit koruuninik amigaateqarluni akiliisinnaajunnaartoq
