LNS rubisiornissaminut piareersimavoq

Piginneqatigiiffiup LNS Greenland A/S-ip, Naalakkersuisunit akuersissummik pissaguni, Qeqertarsuatsiaat eqqaani Aappaluttumi rubinisiorfik ingerlatilissavaa.

Allattoq Sara K. Jakobsen, Thomas Munk Veirum

septembarip 15-at 2016 16:51

Akuersissutillu inissippata rubinisiorneq nanginneqassasoq, piginneqatigiiffiup LNS-ip pisortaata naatsorsuutigaa.

- Rubinisiorfissaq soqutiginarluinnartuuvoq, killiffitsinnullu piniarluta aningaasaliinikooqaagut, ingerlatilernissaalu maanna kissaatigaarput, piginneqatigiiffimmi, Norgemiittumi, LNS-imi pisortaq Frode Nilsen oqarpoq.

Aamma atuaruk Qeqertarsuatsiaat eqqaani rubinisiorfik LNS Greenlandip ingerlatilertussanngorpaa

LNS Greenlandip sulisussanik qassinik pisariaqartitsissanersoq taassuma suli naluaa, ullualunnguilli qaangiuppata ingerlatap nanginnissaanut taakku piareersimapput.

Leonhard Nilsen & Sønner Greenland A/S, LNS Greenlandimik naalisarneqartartoq, True North Gems Greenlandimut atorunnaartumut 27 procentimik piginneqataasimagaluarpoq.

LNS-illi akiliisinnaajunnaartumut aningaasalersuinerunissani kissaatigisimanngikkaa, pisortaq erseqqissaavoq.

Aamma atuaruk Rubinisiorfik neriulluartitsigaluartoq

- Isumaqaratta rubinisiorfimmut aningaasaliinikooqaluta. Piginneqataasut aningaasaliippata aningaasaleeqqinnerusimassagaluarpugut, taamaaliunngillalli, Frode Nilsen oqarpoq.

Akiliisinnaajunnaartumik suliaqartoq Nuna Advokaterineersoq Peter Schriver naapertorlugu Aappaluttumi rubinisiorfik LNS Greenland A/S-imut tunniunneqarnissaa akiitsoqarfigineqartut soqutigisaraat.

- Suliap nanginneqarnissaanut tunngavissiinissaq akiitsoqarfigineqartut soqutigisaraat, taamaasiorpugullu aamma isumaqarpugut akiitsoqarfigineqartut tamatumunnga akuersaassasut, Peter Schriver oqarpoq.