Greenland Express kinguartitseqqittoq

Asasavut Greenland Expressimut ilaallutik angalasussat,
 
Ajuusaarutigeqisatsinnik nalunaarutigissavarput Danmarkip Kalaallit Nunaatalu akornanni timmisartuussinissat tamaasa 2015-imi juulip 27-iata tungaanut taamaatittariaqaratsigit. Tamannalu tunngavigalugu angallanneqarnissamik neqeroorut uatsinnit pisiarisimasat ajoraluartumik tunniussinnaanngilarput.

Greenland Expressip tusagassiorfinnut nalunaarutaa taama oqaasertarpoq, billetsisisimasullu akiliutaat aningaaserivinnit imaluunniit kreditkortinik kiffartuussivinnit billetsimik pisinermi atorneqartunit toqqaannartumik piaarnerpaamik utertinneqassasut aamma nalunaarutigineqarpoq.

AAMMA ATUARUK Greenland Expressip aasaanerani timmisartuusseqqaarnissani kinguartippaa

Greenland Expressip juunip qaammataata naanerani angallassinissani tamaasa aamma kinguartippai - juulip 15-iata tungaanut. Maannalu tassa kingumut kinguartitseqqippoq - tamatumuuna juulip 27-iata tungaanut.
 
Timmisartortitseqatigiiffik aamma allappoq qanoq pisoqarnissaa kingusinnerusukkut sukumiinerusumik nalunaarutigineqarumaartoq. Aammattaaq sullitani neqeroorfigai angalanissap taamaatiinnarneqartup assinganik akeqanngitsumik angalanissamik kingusinnerusukkut neqeroorfigineqarumaartut.

_{Greenland Expressip angalasussanut allagai.}