VIDEO Greenland Expressip aasaanerani timmisartuusseqqaarnissani kinguartippaa

Timmisartuussineq siulleq juulip ulluisa aappaanni, tassa ippassaq pisussatut pilersaarutaagaluarpoq. Timmisartuussinissaq siulleq juulip ulluisa 15-anni pisussatut ullulerneqarpoq, timmisartortitseqatigiiffiup pisortaa Gert Brask tusagassiuutinut nalunaaruteqarluni taama allappoq.

Allattoq Inge S. Rasmussen

juulip 03-at 2015 13:29

Nutserisoq Jaaku Lyberth

Angallannermut Aqutsisoqarfiup qinnuteqaat qaammatinik tallimanik sivisutigisumik suliarisimammagau kinguaattoorneq pisoq, direktør Gert Brask nassuiaavoq.

Tamannali ilumuunngitsoq Angallannermut Aqutsisoqarfik aviisip sermitsiap nittartagaani issuarneqarpoq.

Angallannermut Aqutsisoqarfimmi allaffimmi pisortaq Britt Skovdal Rasmussen isumaqarpoq, qinnuteqaatip suliarineqarnerani angallanermut aqutsisoqarfik sukkasuumik sullissisimasoq.

- Qinnuteqaat juunip ulluisa 17-anni ukiormanna aatsaat tiguarput. Tamanna sioqqullugu Greenland Express Air-imit ilisimatinneqartarpugut qinnuteqaat nassiunneqartoq, Britt Skovdal Rasmussen oqarpoq.

Aamma atuaruk Atorfillit pissaaneqarpallaarmata Greenland Express uninngatinneqarpoq

Qinnuteqaat juunip ulluisa 29-anni akuerineqarpoq, akuersissut timmisartumik ingerlatsisussamut atuuppoq timmisartortitseqatigiiffimmulli Greenland Express Air-imut atuunnani.

Tamanna pivoq, qinnuteqaatigineqartumi paasissutissanik annertunerusunik pisariaqartitsigatta, Britt Skovdal Rasmussen sermitsiaq.ag-mut oqarpoq.

Taamaattummik Greenland Express Air-ip pisortaanit isornartorsiuiuneq Britt Skovdal Rasmussenip paasisinnaangilaa:

- Qinnuteqaatip sivisuallaamik suliarineqarsimaneranik oqarneq Angallannermut Aqutsisoqarfimmit paasisinnaangilarput.

Greenland Expressip timmisartuussinissamik kinguartitsineranut eqqugaasunut ilaavoq nipilersortartoq Simon Lynge, taanna Qaqortumi inuusuttut nipilersornermik pikkorissartinneqarnerannut pikkorissartitsissussaagaluarpoq.