Greenland Contractorsimi pakatsisoqarpoq
Greenland Contractorsimili sulisut allanik suliaqalersinnaanissaat ilimanarsinnaasoq, Greenland Contractorsimi pisortaq, Peter Kofoed oqarpoq.
- Amerikamiut oqartussaasa aaliangiinerat qanoq qisuariarfigissanerlugu qanittukkut isummerfigissavarput. Isertorneqarsinnaanngilarli aaliangiinermut pakatsigatta, Peter Kofoed KNR-imut oqarpoq.
Aamma atuaruk Exelis Servicesip aalajangiineq naatsorsuutigisani naammagisimaarpaa
Amerikamiut oqartussaasa eqqartuussivitsigut ingerlatitseqqiinerat, Peter Kofoedip qanimut malinnaaffigaa. Aalajangiinerlu tamanut tusartinneqanngitsiartoq, Peter Kofoed allagarsitinneqarpoq. Allagarsisut allat tassaallutik sanaartornermi suliaqartut Per Aarsleff A/S aamma MT Højgaard taamatullu Copenhagen Arctic.
Amerikamiut aalajangiinerat atuarluaqqaarneqassasoq, Peter Kofoedip KNR-imut oqaatigaa. Aamma Per Aarsleff A/S-imit taamaalioqqaartoqassasoq, tassani pisortaaneq Ebbe Malte Iversen oqarpoq aaliangiineq atuaqqissallugu kingornalu isummersorfigineqassasoq.
Aamma atuaruk TAMAAT ISIGALUGU Pituffimmi kiffartuussinissamik isumaqatigiissutip annaaneqarnera
Sakkutooqarfimmi sulisut Kalaallit Nunaannut akileraarneq-ajortut amerlinissaat Greenland Contractorsip ernumassutigaa.
- Naak inatsisit tamaasa malinneqassasut aammalu akileraartoqartarnissaa qulakkeerneqassasoq oqaatigineqaraluartoq - Kalaallit Nunaannut akileraartussaatitaanngitsunik amerlanerusunik sakkutooqarfimmi sulisoqalersinnaanera aarleqqutigaarput.
Greenland Contractorsip siulersuisuni siulittaasoq Peter Kofoed, taama oqarpoq. Taassuma aamma oqaatigaa suliffeqarfiup Pituffimmi kiffartuussinissamik isumaqatigiissut annaavissussagaluaruniuk aatsitassanik suliniutinik siunissami immaqa suliaqarsinnaassasoq.
Copenhagen Arcticimi, amerikamiut suliffeqarfiutaannik Dyncorpimit 30%-imik pigineqartumi pisortat Jeppe Handwerk aamma Gregers Juul oqaaseqartinniaraluaratsigit iluatsinngilarput.
Aamma atuaruk Exelisip aalajangiiffigineqarnera Lidegaardip Præsidentip Illorsuani qaqinniarpaa
