Great Greenlandimi pisortaq: Jim Lyngvild sulisinngilarput
Danskip atisanik ilusilersuisartup Jim Lyngvildip Great Greenlandip puisip amiutai atorlugit assitut eqqumiitsuliai aammalu kingusinnerusukkut atisaliai saqqummersinneqarumaartussat saqqummersinneqarnerisa kingunerisaanik Great Greenland sapaatip akunnerani qaangiuttumi oqallinnermik sakkortuumik eqqorneqarpoq.
Assit inuit oqallittarfiisigut siammarterneqaqaat, isornartorsiuinermilu qitiutinneqarneruvoq, danskimit avataaneersumit kalaallit kulturiata saqqummiunneqarnera inissaminiissorinngimmassuk.
Great Greenlandip pisortaata Preben Møllerip Jim Lyngvildip puisip amii atorlugit assilisai, taamak kamassutaatigimmata.
- Great Greenlandip Jim Lyngvild suliakkinngilaa, Great Greenlandili amernik tunisivoq Jimip atugassaanik, Great Greenlandip pisortaa Preben Møller KNR-mut oqarpoq.
Isornartorsiuisut isornartorsiuiinnanngillat, aammali Great Greenlandip amiutaanik piseqqusiunnaartoqarnissaanik atsiornernik katersisoqarpoq.
AAMMA ATUARUK Kalaallit eqqumiitsuliortut piumanngimmata, Jim Lyngvild sassarpoq
- Tamanna pitsaasuunngilaq, piniartortagummi eqqarsaatigisussaavagut, amminimmi inuussutissarsiuteqarput naggataagullu taakkununnga tussaaq, Preben Møller oqarpoq.
Taassumunnga pingaaruteqarpoq erseqqissassallugu, Great Greenland Jim Lyngvildimut suleqatiginninnissamik aperisimanngimmat, illuatungaanilli tamanna pivoq.
- Jim Lyngvild suliakkinngilarput, nammineruna suliamik aallartitsisoq, uagullu suliffeqarfittut atortussaanik tunissuteqaannartussaavugut, oqarpoq.
Kikkut tamarmik amiutigut atorsinnaavaat
Jim Lyngvildip assilisai puisip amia tamanut iliorlugu assilisaapput, soorlu kalaallinik assilisittartunik pinngortitamiittunik atuivoq.
Tamannali iluanngitsoq, ilaat isumaqarput, soorluttaaq Klaudia Petersen taama isumaqartoq.
- Aasit avataaneersumit nunarput ilisaritinneqarpoq, uumasut nujuartatut ililluta saqqummiuppaatigut, Kalaallit Nunaajutiga kalaaliutikka, taamatut saqqummiusseriaaseqarnera allaanngilaq uagut pigigaatigut, taanna tallimanngormat KNR-mut oqarpoq.
AAMMA ATUARUK Ivínguak Stork Høegh Great Greenlandip nioqqutaanik pisiumajunnaarniarneq pillugu: Annilaangavunga
Taannami isumaqarpoq kalaallit eqqumiitsuliortui atorneqarsimassagaluartut:
- Kulturerput anersaaqarpoq tigoriaannagassatut ilillugu qanorsuaq suliariinnagassaanngitsoq, Klaudia Petersen oqarpoq.
Preben Møller isumaqarpoq assit saqqummiunneqartut kusanarluinnartut, aammalu isumaqannginnerarpoq Great Greenlandip puisip amiutai taassuma isumaatut atorneqanngitsut.
- Kikkut tamarmik amiutitsinnik atuisinnaapput, tassa Jimip soorlu atuineratut namminermi aalajangissavaa qanoq atussallugit, inuit oqarfigisinnaanngilagut ammit imatut imatullu atussagaat, taamaaliorsinnaanngilagut saqqummersitsinissamut kikkulluunniit suliniuteqarumasut qinnuteqaatigisinnaasaannut.
Lyngvild nittarsaassinermik pilersitsivoq
Great Greenlandip kalaallit eqqumiitsuliiortui suleqatigerusuppai, pisortaq oqarpoq:
- Jim kisimi taamatut suliaqarumalluni saaffiiginnippoq, allanik kalaallinik saaffiginnittoqanngilaq ajoraluartumik. Kalaaleq atisanik ilusilersuisartoq saaffiginnissimagaluarpat imaluunniit inuit nuimasut ilaat saaffiginnissimagaluarpat aamma akuersisimassagaluarpugut, suliniutinummi soorlu taama ittunut arlalinnut tapiissutitut amernik tunniussaqartarpugut.
Misigivisi, Great Greenland atisanik ilusilersuisartunut tapersersuinissaminut akisussaasuusussaasoq?
- Kalaallit ilusilersuisartut tapersersorpavut, kinaluunniit ilusilersuisartoq puisip amia atorlugu ilusilersuerusuppat akuersissaagut, Preben Møller oqarpoq.
Taassuma isaaniit aamma Jim Lyngvildip assilisaasa oqallisaanerat ajunngitsumik sunniuteqassangatinneqarput.
- Jimip assilisai siornatigut misilittagaqarfigereerpagut malugaarpullu tamatuma kingorna tunisaqangaatsiarluta, tamanna avammut ussassaarutaalluartuuvoq, taanna oqarpoq.
