Great Barrier Reefip eqqaani aamarsuarsiorfiliornissaq Australiami akuersissutigigaat
Nutaarsiassaqartitsivik AFP taama allaaserisaqarpoq.
Aamarutissarsiorfik Carmichael Australiami aamarutissarsiorfinni anginerpaanngussaaq. Taassuma pilersinneqarnissaata avatangiisinut aningaasalernissaanullu tunngatillugu apeqqutit pissutigalugit ukiorpaalunni kinguartoorsimavoq.
Aamarutissarsiorfiup Carmichaelip aamarutissanik 60 million tonsiinik piiaaviusinnaanissaa nalilerneqarpoq.
Sanaartorneqarnissaali tamanit ilorrisimaarutigineqanngilaq.
Australiami avatangiisit pillugit suliniaqatigiiffiit aamarutissarsiorfiup pilersinneqarnissaanut ukiuni qassiiusuni akerliusimapput.
Suliniaqatigiiffiup oqarnera naapertorlugu Galilee Basinimi aamarutissarsiorfik nunarsuup kiatsikkiartorneranut kissatsitsiartoqataassallunilu Great Barrier Reefimut ajoqusiissaaq.
Tamatuma saniatigut australiamiut affaat sinnerlugit aamarutissarsiorfimmut akerliusut nuna tamakkerlugu apersuinermi paasineqarpoq. Australiami nutaarsiassaqartitsiviit qassiusut taama allaaserisaqarput.
Nutaarsiassaqartitsiviup dpa-p allaaserisaa naapertorlugu immap ukiuni kingullerni nalinginnaanngitsumik kissarnera pissutigalugu Great Barrier Reefimi koraalit 30 procentiisa tungaannut toqorarsimasut ilisimatuut missiliorpaat.
