Grækenlandimi ministeriuneq: Silap pissusiata allanngoriartornera takornariartitsinermut iluaqutaasinnaavoq
Grækenlandimi pinngortitami aasaq manna ikuallannersuaqareersorlu, orpippassuit ikuallallutillu inunnik ajunaartoqareersorlu, silap pissusiata allanngoriartornerata kingunipilui Grækenlandimiut nuannarivallaarunanngikkaat isumaqartoqarsinnaavoq, immikkummi ilisimasallit isumaqarput pinngortitami ikuallannerpassuit silap pissusiata allanngoriartorneranit pisut.
Silalli ataatsimut isigalugu kiatsikkiartornerani suut periarfissaasinnaanersut aamma misissorneqartariaqarput.
Grækenlandimi ministeriuneq Kyriakos Mitsotakis nutaarsiassaqartitsivimmit Bloombergimit apersorneqarluni taama ilaatigut oqarpoq:
- Silap pissusiata allanngoriartornerata kingunerisaanik ukiup ingerlanerani takornariartitsisarneq sivitsorneqarsinnaavoq, Mitsotakis apersorneqarnermini oqarpoq.
Silap pissusiata allanngoriartornera miserratissaanngitsoq Mitsotakis oqarpoq, pissutsinullu nutaanut naleqqussartoqartariaqarsoralugu.
Grækenlandimi orpippassuit aasaq manna ikuallammata inuit ikinnerpaamik 30-t ajunaarput.
Inuit ikinnerpaamik 30.000-t pinngortitami ikuallattoqarnerata kingunerisaanik najukkaminnit Grækenlandimi aasaq manna qimagussorneqarput.
