Namminiilivinnissaq qineqqusaarnermi oqallisigineqarpallaanngitsoq
Tamanna naalakkersuinikkut pissutsit pillugit oqaaseqartartup inuiaqatigiillu pissusiannik ilisimatuup Klaus Georg Hansenip ilumoornerarpaa.
- "Siamasissumik suleqatigiinnissaq" maanna oqaluuserineqarneruvoq, qineqqusaarnermilu kingullermi "inuutillunga namminiilivinnissamik" Aleqa Hammondip eqqartuinera maanna annikinneraarsuulluni, Klaus Georg Hansen aviisimut taama oqarpoq.
Aleqa Hammondip aporaanniarpalaartumik pissuseqarnera soorlu "Danmarkimit pisssarsiaasa pitsaanersaat tassaasoq miseraq kajortoq" maanna atorneqanngilaq, tamannalu Venstret Kalaallit Nunaannut tunngasunut oqaaseqartartuata Claus Hjort Frederiksenip nuannaarutigaa.
- Kalaallit Nunaanni oqallinnerup piviusorsiornerulernera nuannaajallannarpoq, Berlingske Tidendemut oqarpoq.
Aamma atuaruk Peqatigiiffik: Namminersulivinniarneq unitsillugu ataatsimoorneq pilersitsigu
Søren Espersenillu Dansk Folkepartimeersup isumaqatigaa:
- Namminiilivinnissamik oqalunneq Naalagaaffeqatigiinnik toquusartitsisimavoq, aamma kalaallit qallunaallu naalakkersuisuisa akornanni pissuseqatigiinneq aatsaat taama ajortigigunarpoq. Taamaammat nutaamik eqqarsartoqalernera nuannaajallannarpoq, Søren Espersen oqarpoq.
Socialdemokraatit Kalaallit Nunaannut tunngasunut oqaaseqartartuata, Flemming Møller Mortensenip, Kalaallit Nunaanni pissutsit akuliuffigerusunngilai Kalaallit Nunaannilu namminiilivinnissamik oqallinneq ernumanartippallaarnagu:
- Namminiilivinnissaq Kalaallit Nunaanni partiinit tamanit ukiorpassuarni oqallisigineqartoq nalunngilarput. Kalaallit DNA-vanniippoq, periarfissarlu aningaasatigullu imminut napatissinnaaneq anguneqarpat namminiilivittoqassaaq, Socialdemokratineersoq Berlingske Tidendemut taama oqarpoq.
