NALUNAARUSIAQ Kalaallit Danmarkimiittut inuiattut ikinnerussuteqartutut inissisimalissanersut oqallisigineqartariaqarpoq
Kalallit Danmarkimiittorpassuit kalaaliunertik pillugu immikkortitaasutut misigisartut, Nalunaarusiami nutaami naqissuserneqareersorlu taamaaaliorput.
Inuit nunaminni ikinnerussuteqartut pillugit EU-mi isumaqatigiissut Danmarkip 1997-imi atuuttussanngortippaa - isumaqatigiissullu Danmarkimi kalaallinut atuutissanersoq eqqarsaatigisassaqqippoq.
Inuit pisinnaatitaaffii pillugit Danmarkimi ilisimatusarfik taama naliliivoq.
- Kalaallit Danmarkimiittut nunaminni ikinnerussuteqartutut akuerineqarnissamik kissaateqarnersut misissorneqassasoq kissaatigaarput, ikinnerussuteqartunut taamaaliorneq pitsaaquteqarmat, inuit pisinnaatitaaffii pillugit Danmarkimi ilisimatusarfiup naligiimmik atugaqartitsinissamut tunngasunik suliaqartuinut pisortaq, Maria Ventegodt Liisberg, oqarpoq.
Aamma atuaruk Tikilluaqqusinissamut neqeroorut Aalborg Kommunep taamaatiinnarpaa
Tassami Danmarkimi najugallit kalaallinit kingoqqisut tallimaagaangata ataaseq inunnik isummiussereeersimasunik naapitaqartartoq, ilisimatusarfiup taassuma nalunaarusiaani paasinarsivoq.
Taamaattunillu naapitaqarneq ajornerusumik pineqarnermik arlalitsigut kinguneqartarpoq, naak kalaallit qallunaatut innuttaassuseqaraluartut. Tamannali inuiaqatigiinni ikinnerussuteqartutut akuerineqarnikkut iluaquserneqarsinnaasoq, Maria Ventegodt Liisberg isumaqarpoq:
- Inuiattut ikinnerussutilittut akuerisaaneq isumaqarpoq allaanerunermik akuerineqarneq, matumanilu Danmark ilisimatinneqassasoq, allaanerusuunersi immikkuullarissuunersilu illersoripput. Aammalu akuersaaripput, kalaallinut maani immikkut atugaqartitsisugut, naligiimmik atugaqartitsinissamik tunngasunik ilisimatooq oqarpoq.
Aamma atuaruk Kalaallit Danmarkimiittut inooqataaniarnermikkut ajornartorsioqaat
Kalaallit Danmarkimiittut inuiattut ikinnerussuteqartutut isigineqartariaqanngitsut Qallunaat naalakkersuisuisa Namminersornerullutillu Oqartussaaasimasut EU-mut arlaleriarlutik oqaatigisarpaat, kingullermik 2010-mi.
Kisianni Danmarkimiittut kalaallinik kingoqqisuusut tamanna isummerfigisariaqaraat, inuit pisinnaatitaaffii pillugit Danmarkimi ilisimatusarfik isumaqarpoq.
- Kalaallit Danmarkimiittut inuiattut ikinnerussuteqartutut akuerineqarnissaannaat inassutiginngilarput. Taamaammanuna inassutivut nangaassutitaqartut oqarluta, kalaallit Danmarkimiittut inuiattut ikinnerussuteqartutut akuerineqarusunnersut paasiniarlugu oqaloqatigineqassasut.
Danmark Nunani Avannarlerni kisimiilluni nunap inoqqaavisa naalagaffimmiittut ikinnerussuteqartuunerannik suli akuerinninngitsortaavoq. Nunap inoqqaavi Norgemiittut, Sverigemiittut Finlandimiittullu taamatut akuerisaapput.
Inuiaat ataasiinnaat Danmarkimi ikinnerussuteqartutut inissisimapput, tassalu tyskit Jyllandip kujasissuani najugallit.
Nalunaarusiaq tamakkerlugu Inuit pisinnaatitaaffii pillugit Danmarkimi ilisimatusarfiup nittartagaani atuarneqarsinnaavoq.
