Tikilluaqqusinissamut neqeroorut Aalborg Kommunep taamaatiinnarpaa
Tamanna 2015-ip sinneranut atuutsinneqassasoq, Aalborg Kommune Kalaallit Aalborgimi Illuutaannut Aalborgimilu peqatigiiffiinut taama ilaatigut allagaqaateqarpoq.
Neqeroorutit qulaani taaneqartut sullinniakkanut tamakkiisumik naammassineqarsinnaannginnerat matumani pissutaasoq, Aalborg Kommunemi kalaallinik sullissisut immikkoortortaqarfiat taama allagaqaateqarpoq, neqeroorutinillu atuisartut aamma ikippallaartut oqaatigalugu.
Tunngavilersuut taanna kalaallit Aalborgimi peqatigiiffiisa ilaannit Ikerasammit isornartorsiorneqarpoq. Siulittaasuat Juusi W. Petersen isumaqarpoq neqeroorutit kukkusumik aallaqqaammulli neqeroorutiginmeqarsimasut, kommunimmi kalaallinut saaffiginnittarnera pitsaanerusinnaasoq taassuma oqaatigaa:
- Sullissisut sullinniakkaminnik oqaloqateqaraangamik paasinartumik naleqquttumillu saaffiginnittassapput, aaqqiissutaasinnaasunillu pitsaavallaanngitsunik paasiuminaassinnaasunillu ussiataariniartussaanatik, Juusi W. Petersen, neqeroorutit mattunneqarniarnerannut atatillugu ilaatigut taama allaaserisaqarpoq.
Kalaallit Danmarkimi inuuniarnermikkut ajornartorsiuteqartut pillugit Danmarkimi illoqarfinni annerni sisamani iliuusissatut pilersaarutit aqqutigalugit Kalaallit Aalborg Kommunemut nooqqammersut tikilluaqquneqartarnissaannut ammasumillu siunnersorneqarnissaannut neqeroorutit Aalborgip 2013-imi neqeroorutigisalerpai.
Kalaallit Aalborgimut nuuttut Kalaallit Illuutaannit Kofoeds Skolemiillu suli siunnersorneqarsinnaassapput.
Nuuttut tikilluaqquneqartarnissaannut ammasumillu siunnersorneqartarsinnaanissaannut neqeroorutit ukiortaamit ammaqqinneqassanersut suli ilisimaneqanngilaq.
