GrønlandsBANKEN iluanaaruteqarnerullunilu taarsigassarsiaqartitsinerusoq
113,4 millionit koruunit. Tassa Grønlandsbankenip akileraarutit peernagit 2016-imi sinneqartoorutai, 2015-imut naleqqiullugit 7 millionit koruuningajannik amerlanerullutik.
2016-imili angusat pitsaasut allanik aamma ilaqarput. Grønlandsbankenimi siorna 2016-imi aatsaat taama taarsigassarsisitsisimatigaaq, 3,1 milliardit koruunit taarsigassarsisitsissutigineqarsimallutik.
AAMMA ATUARUK Grønlandsbanken aningaasaateqartorujussuusoq
Grønlandsbankenillu siorna angusarisimasani tupinnanngitssumik nuannarai:
- Naatsorsuutit takutippaat, aningaasaqarnikkut, uninngasuutitigullu isumannaatsumik inissisimanerput suli attakkipput. Kisianni nuannaarutiginerpaasarput tassaavoq oqaluttuarisaanermi aatsaat taama taarsigassarsisitsisimatigigatta, Grønlandsbankenip pisortaa Martin Kviesgaard oqarpoq, aningaaseriviullu ingerlalluarnera nunatsinni aningaasaliisarnerit ingerlallualersimanerannit ilaatigut aallaaveqartut oqaatigalugu:
- Soorunami taama ineriartorneq iluarisimaaqaarput, tamatumami takutippaa Kalaallit Nunaanni aningaasaliisarnerit ingerlalluarnerulersimasut, aammalu unammillersinnaassuseqartugut, niuernerlu eqqarsaatigalugu pitsaasumik inissisimasugut, Martin Kviesgaard oqarpoq.
AAMMA ATUARUK Grønlandsbankenip sinneqartoorutai ikilerialaarput
Grønlandsbankenillu ukioq manna aamma ingerlalluarnissaa pisortap naatsorsuutigaa:
- Illoqarfinni inuttunerusuni sanaartukkut annertuut, takornariaqarnerup siuariarnera, aalisarnerullu ingerlalluarnera, tassaapput ukiup ingerlanerani isumallualersimanermut pissutaaqataasimasut. Tamannalu ilutigalugu naatsorsuutigaarput Kalaallit Nunaanni aningaasarsiornikkut ineriartornerup pitsanngoriartornera 2017-imi nangeqqissasoq, Martin Kviesgaard oqarpoq.