Grønlandsbanken aningaasaateqartorujussuusoq

Danmarkimi Aningaaserivinnik nakkutilliisoqarfimmit Grønlandsbankimi majimi junimilu misissuipput, tassanilu Grønlandsbanki aningaasaateqarluartuusoq paasisimavaat.

Qanormi tamanna isumaqarpa?

Grønlandsbanki nipilersortartutut takorlooruk. Nipilersorniaraanni nipilersuuteqartariaqassooq. Guitariusinnaavoq. Tassalu aningaaserivik pitsaasuussaguni ingerlalluarlunilu aningaasaateqartariqarpoq.

Grønlandskbankimilu nipilersuuterpassuaqarput. Ilumut amerlasoorsuit, Grønlandsbankimi pisortaq, Martin Kviesgaard taama oqarpoq.

- Naammattumik aningaasaateqarpugut, pisariaqartitatta marloriaataasa missaannik aningaasaateqarpugut.

Taamaannerami aamma ajunngittorujussuusinnaavoq. Nipilersuutit amerlanerujartonerutillugit nipit amerlanerusut atorneqarsinnaapput, nipilersortorlu ataaseq ajutuulaarpat malunnarnavianngilaq.

Radio aviisip Grønlands Banken pillugu ilanngutassiaa tusaajuk

Aningaasat aamma taamaapput. Grønlandsbankip pisariaqartitaami marloriaatingajannik aningaasaateqartoq, Danmarkimi Aningaaserivinnik nakkutilliisoqarfimmiit nalunaarutigineqarpoq. Aningaaserivik aningaasaateqarnerujartortillugu, taava aningaasaqarnikkut ajutoornermit eqqugaanissamit aniguilluarsinnaanerujartuinnassaaq.  

Taamaannera pitsaaqaaq. Aningaaserivik isumakulunnanngilaq, uagullu sullitatsinnut eqqissilluta sullissisinnaalluta.

Nipilersuuteqarpallaarsinnaavorli, qanoq issava nipilersortut ilaat nipilersorluanngippata.

- Tassami aningaasat erniat qaffasikkallarmata tusarnequtaasut, erniat apparmata tusarniillissutaapput. Tassalu aningaaserivik aningaasaaterpassuaqaruni atukkiutinngisaminik, aningaasarpassuit tamakkua siornatigornit tusarniinnerulissapput, Bank Resarchimi pisortaq, Nicholas Rohde, taama oqarpoq.

- Naalagaaffiup aningaaserivussuata aningaasanik paarsigaangami erniaritittagaa killormut sammivoq. Taamaammat aningaasanik uninngatitsiinnarneq maannakkorpiaq iluanaarutaavallaanngilaq.

Tassalu Grønlandsbankip aningaasaaterpassui siornatigutut nipilersorluartiginngillat. Aningaaseriviullu aningaasarsiorniarneranut tamanna ajoqutaavoq.

Aningaaserivillu atukkiussuinermigut aningaasanik amerlanerusunik iluanaaruteqarsinnaagaluarluni, kimut atukkiussisanerluni isumaliuutigeqqaartussaavaa. Taamaanngippat taarsigassarsisoq nipilersornerliussaaq aningaasallu taarsernagit.

- Tamannalu qallunaat aningaaseriviinisulli annaassaqarnermik kinguneqariataassaaq.

- Iluanaaruteqarneruniaraanni aamma annaasaqariaqataarsinnaanermut piareersimasariaqarpoq. Grønlandsbankillu aningaasaatiminik aarlerinanngitsumik atuisarniarluni aalajangersimanera, uanga isumaqataaffigaara.

Tassalu Grønlandsbankip kikkunnut tamanut, immaqa taarsiisinnaanngitsunut, atukkiussuinani aningaasaateqarluanera pitsaasuuvoq. Tassami aningaasarsiorluarsinaagaluarluni aningaaserivimmut isumannaatsuusutut takutitsinissaq naleqarneruvoq.