Grønlandsbankenip sinneqartoorutai ikilerialaarput
Obligationinit erniasiat Nationalbankillu ernialiussaata 0-ip ataaniissimanera tamatumunnga pissutaanerpaapput
- Ukiormanna qaammatini siullerni pingasuni angusat naammaginarput, ernialli maannamut appasissumiittuarnerat pissutigalugu patajaatsumik ingerlatsisimanerup kusanassusia iluamik ersersinneqanngilaq saniatigullu aamma ukiup siulianut sanilliullugu annertunerusunik nalitigut annaasaqarluta, aningaaseriviup pisortaanera Martin Kviesgaard tusagassiorfinnut nalunaaruteqarluni taama allappoq.
Naak aningaasanik niuerfiusumi erniat 0-ip ataaniinnerat aningaaseriviup ingerlatsineranik naqitsisimaaraluartoq, aningaaseriviup pisortaanerata ukioq manna qaammatini siullerni pingasuni angusat pitsaasuuneri ajunngitsortaqartut takusinnaalluarpaa.
Erniat appasissut
Tikkuarpaalu aningaaseriviup annaasai taarsigassarsianullu atatillugu nalikilliliineri aammalu sillimmasiissutit suli appasissumiinnerat kiisalu erniat appasissut pissutigalugit atuisut, soorlu illusinissamut biilisinissamullu atatillugu, akikinnerusunik taarsigassarsisinnaanerat.
- Malugisinnaavarput upernariartulersoq, sullitavullu ataasiakkaat inissianik/illunik niueqatigiinnerulernerat nutaanillu biilisiortulernerat aammalu sanaartornermik ingerlatsisuusut ulapputeqarnerulernerat malugisinnaavarput, Martin Kviesgaard oqarpoq nangillunilu:
-Aningaaseriviup Qaqortumi immikkoortortaqarfini nutartertereerlugu nukissamillu atuinikinnerusunngorsareerlugu ammaqqeqqammerpaa aammalu maanna Maniitsumi immikkoortortaqarfiup nutarterneqarnera aallartinneqarpoq. Tamakku tamarmik takutippaat, Kalaallit Nunaanni siunissaq upperigipput aningaasaliiffigalugulu, Martin Kviesgaard oqaluttuarpoq.
Ukioq aallartilluartoq
GrønlandsBANKEN-imiillu naatsorsuutigineqarpoq, BNP 2016-imi suli qaffariaqqissasoq ilaatigut sanaartortoqarnerulernera raajartassallu qaffanneqarnerat pissutigalugu.
- Ukioq manna qaammatini siullerni pingasuni angusat tunngavigalugit ukioq aallartilluarparput, aningaaseriviullu naatsorsuutigivaa 2016-imi naammaginartumik ineriartornissaq, naak erniat appasinnerat pissutigalugu suli akunnattuunganartoqarsinnaassagaluartoq, aningaaserivimmi pisortaaneq Martin Kviesgaard taama naggasiivoq.
